କଲମ୍ବୋ,୧୨।୪: ଆର୍ଥିକ ସଙ୍କଟ ମଧ୍ୟ ଦେଇ ଗତି କରୁଥିବା ଶ୍ରୀଲଙ୍କା ନିଜକୁ ଦେବାଳିଆ ଘୋଷଣା କରିଛି। ସ୍ଥିତି ଦିନକୁ ଦିନ ବିଗିଡ଼ୁଥିବାରୁ ଏସବୁର ପ୍ରଭାବ ଏବେ ଆଇପିଏଲ୍ ଉପରେ ପଡ଼ିବା ଆଶଙ୍କା ପ୍ରକାଶ ପାଇଛି। କାରଣ ଆଇପିଏଲ ଖେଳୁଥିବା କିମ୍ବା ଏହା ସହ ଯୋଡ଼ି ହୋଇ ରହିଥିବା ଖେଳାଳିମାନଙ୍କୁ ଟୁର୍ନାମେଣ୍ଟ ଛାଡ଼ିବାକୁ ଦେଶର ପୂର୍ବତନ କ୍ରିକେଟର ତଥା ମନ୍ତ୍ରୀ ଅର୍ଜୁନ ରଣତୁଙ୍ଗା ଆହ୍ବାନ ଦେଇଛନ୍ତି। ଖେଳାଳିମାନେ ତୁରନ୍ତ ଆଇପିଏଲ ଛାଡ଼ି ଦେଶର ଏପରି ଘଡ଼ିସନ୍ଧି ମୁହୂର୍ତ୍ତରେ ସହଯୋଗ ପାଇଁ ଛିଡ଼ା ହୁଅନ୍ତୁ ବୋଲି ସେ କହିଛନ୍ତି।
ରଣତୁଙ୍ଗା କହିଛନ୍ତି, କିଛି କ୍ରିକେଟର(ଶ୍ରୀଲଙ୍କା) ବର୍ତ୍ତମାନ ବେଶ ଆନନ୍ଦର ସହ ଆଇପିଏଲ୍ରେ ଖେଳୁଛନ୍ତି। ସେମାନେ ଏଯାଏ ନିଜ ଦେଶ ସମ୍ପର୍କରେ କିଛି ବି କହୁନାହାନ୍ତି। ଦୁର୍ଭାଗ୍ୟବଶତଃ ଲୋକମାନେ ସରକାରଙ୍କ ବିରୋଧରେ ମୁହଁ ଖୋଲିବାକୁ ଡରୁଛନ୍ତି। ଏହି କ୍ରିକେଟରମାନେ କ୍ରିକେଟ ବୋର୍ଡ ପାଇଁ କାମ କରୁଛନ୍ତ, ଯାହାକି ଶ୍ରୀଲଙ୍କା ସରକାରଙ୍କ ଅଧୀନରେ ଥିବା ମନ୍ତ୍ରଣାଳୟ ମଧ୍ୟରେ ଆସୁଛି। ସେମାନେ ନିଜ ଚାକିରି ବଞ୍ଚାଇବାକୁ ପ୍ରୟାସ କରୁଛନ୍ତି। ହେଲେ ଏବେ ସେମାନେ ଆଗକୁ ଆସି ବିରୋଧକୁ ସମର୍ଥନ କରିବା ଲାଗି ମନ୍ତବ୍ୟ ଦିଅନ୍ତୁ ବୋଲି ସେ କହିଛନ୍ତି।
ଯେତେବେଳେ କିଛି ଭୁଲ ଘଟଣା ଘଟୁଛି ସେତେବେଳେ ଏହା ବିରୋଧରେ ମୁହଁ ଖୋଲିବାର ସାହାସ ସମସ୍ତଙ୍କ ପାଖରେ ରହିବା ଦରକାର। ଏହି ସମୟରେ ନିଜର ବ୍ୟବସାୟ କଥା ଚିନ୍ତା କରିବା ଉଚିତ ନୁହେଁ। ସମସ୍ତେ ଜାଣିଛନ୍ତି କେଉଁ ଶ୍ରୀଲଙ୍କା କ୍ରିକେଟର ଆଇପିଏଲ୍ ଖେଳୁଛନ୍ତି। ସେମାନଙ୍କ ନାଁ କହିବାକୁ ଚାହୁଁନାହିଁ। କିନ୍ତୁ ମୁଁ ଚାହେଁ ସମସ୍ତ ଶ୍ରୀଲଙ୍କା କ୍ରିକେଟର ସପ୍ତାହକ ପାଇଁ ସେମାନଙ୍କ ଆଇପିଏଲ ଛାଡ଼ି ଆନ୍ଦୋଳନକୁ ସମର୍ଥନ କରନ୍ତୁ ବୋଲି ରଣତୁଙ୍ଗା ମଧ୍ୟ କହିଛନ୍ତି।