ନୂଆଦିଲ୍ଲୀ,୨୯।୧୧: ଆଇପିଏଲ୍ ୨୦୨୪ ପାଇଁ ପ୍ରସ୍ତୁତି ଆରମ୍ଭ ହୋଇଛି। ଆଇପିଏଲ ୨୦୨୩ରେ ରାଜସ୍ଥାନ ରୟାଲ୍ସ ପାଇଁ ଖେଳିଥିବା ରବିଚନ୍ଦ୍ରନ ଅଶ୍ୱିନ ତାଙ୍କର ଏକ ନୂତନ ଭିଡିଓରେ ଆଇପିଏଲ ୨୦୨୪ ନିଲାମ ବିଷୟରେ ବଡ ଭବିଷ୍ୟବାଣୀ କରିଛନ୍ତି। ଆଇପିଏଲ ଦଳ ପରବର୍ତ୍ତୀ ସିଜିନ୍ ପାଇଁ ସେମାନଙ୍କ ଖେଳାଳିଙ୍କୁ ରିଲିଜ୍ କରିଛନ୍ତି। ସମସ୍ତ କ୍ରିକେଟ ପ୍ରଶଂସକ ଡିସେମ୍ବର ୧୯ରେ ଦୁବାଇରେ ଅନୁଷ୍ଠିତ ହେବାକୁ ଥିବା ଆଇପିଏଲ ନିଲାମକୁ ଅପେକ୍ଷା କରିଛନ୍ତି।
ସେହି ନିଲାମରେ ଭାରତୀୟ ତଥା ବିଦେଶୀ ଖେଳାଳିଙ୍କ ଉପରେ ବଡ ନିଲାମ ଆଶା କରାଯାଉଛି। ଏହି ଆଇପିଏଲ ନିଲାମରେ ରିଲିଜ୍ ହୋଇଥିବା କିଛି ଖେଳାଳି ଅଧିକ ଟଙ୍କାରେ ନିଲାମ ହୋଇପାରନ୍ତି ବୋଲି ଭାରତର ଅଭିଜ୍ଞ ଅଫ ସ୍ପିନର ରବିଚନ୍ଦ୍ରନ ଅଶ୍ୱିନ ବିଶ୍ୱାସ ରଖିଛନ୍ତି। ତାଙ୍କ ୟୁଟ୍ୟୁବ ଚ୍ୟାନେଲରେ ଏହି ବିଷୟରେ ଆଲୋଚନା କରି ଅଶ୍ୱିନ କହିଛନ୍ତି ଯେ, ଶାହାରୁଖ ଖାନଙ୍କ ପାଇଁ ସିଏସ୍କେ ଏବଂ ଗୁଜରାଟ ମଧ୍ୟରେ ଫାଇଟ୍ ହେବ ବୋଲି ମୁଁ ଭାବୁଛି। ଗୁଜରାଟ ହାର୍ଦ୍ଦିକ ପାଣ୍ଡ୍ୟାଙ୍କୁ ରିଲିଜ୍ କରିଛି, ତେଣୁ ବର୍ତ୍ତମାନ ସେମାନଙ୍କୁ ଏପରି ଜଣେ ଖେଳାଳି ଦରକାର ଯିଏ ସେମାନଙ୍କ ପାଇଁ ଖେଳ ଶେଷ କରିପାରିବେ। ସେମାନଙ୍କ ଦଳରେ ପାୱାର ହିଟର୍ର ଅଭାବ ଅଛି, ଏବଂ ସେମାନଙ୍କୁ ପାୱାର ହିଟର ଦରକାର।
ଅଶ୍ୱିନ ଆହୁରି ମଧ୍ୟ କହିଛନ୍ତି , ଶାହାରୁଖ ଖାନ ପଞ୍ଜାବ କିଙ୍ଗ୍ସରେ ୯ କୋଟି ଟଙ୍କାରେ ଥିଲେ, ମୁଁ ଭାବୁଛି ସେ ସେଠାରେ ନିଜର ଦକ୍ଷତା ପ୍ରଦର୍ଶନ କରିଛନ୍ତି। ମୁଁ ଭାବୁଛି ଦଳ ତାଙ୍କ ପାଇଁ ନିଲାମରେ ୧୨-୧୩କୋଟି ଟଙ୍କା ପର୍ଯ୍ୟନ୍ତ ଯାଇପାରେ।
ସୂଚନାଯୋଗ୍ୟ, ଶାହାରୁଖ ଖାନଙ୍କୁ ପଞ୍ଜାବ ଦଳରେ ଫିନିସର ଭାବରେ ରଖାଯାଇଥିଲା ଏବଂ ସେ ୧୬୫.୯୬ ଷ୍ଟ୍ରାଇକ ହାରରେ ରନ ସ୍କୋର କରିଥିଲେ।