ନୂଆଦିଲ୍ଲୀ,୧୦।୧୦: ଦିଲ୍ଲୀରେ ବିଶ୍ୱ ହିନ୍ଦୁ ପରିଷଦ (ଭିଏଚ୍ପି)ର ଏକ ରାଲି ଘୃଣା ଭାଷଣ ମଞ୍ଚରେ ପରିଣତ ହୋଇଛି। ଯେଉଁମାନେ ତୁମକୁ ଆକ୍ରମଣ କରୁଛନ୍ତି ସେମାନଙ୍କ ମୁଣ୍ଡ କାଟିବା ସହ ହାତ ହାଣିଦିଅ ବୋଲି ରାଲିରେ ଯୋଗଦେଇଥିବା ଜଗଦ୍ଗୁରୁ ଯୋଗେଶ୍ୱର ଆଚାର୍ଯ୍ୟ କହିଥିଲେ। କିଛିଦିନ ପୂର୍ବରୁ ଦିଲ୍ଲୀରେ ଜଣେ ୨୫ ବର୍ଷୀୟ ଯୁବକଙ୍କୁ ମୁସଲମାନ ସମ୍ପ୍ରଦାୟର କେତେଜଣ ହତ୍ୟା କରିଥିଲେ।
ଏହାକୁ ଲକ୍ଷ୍ୟକରି ଜଗଦ୍ଗୁରୁ ଉପରୋକ୍ତ ମନ୍ତବ୍ୟ ଦେଇଛନ୍ତି। ଆକ୍ରମଣକାରୀଙ୍କୁ ଚିହ୍ନଟ କରି ମାର। ଆବଶ୍ୟକ ହେଲେ ସେମାନଙ୍କ ହାତ ଓ ମୁଣ୍ଡ କାଟିଦିଅ। ଏଥିପାଇଁ ଜେଲ ଯିବାକୁ ପଡ଼ିବ। କିନ୍ତୁ ଏହା ସେହି ତତ୍ତ୍ୱମାନଙ୍କୁ ଉପଯୁକ୍ତ ଶିକ୍ଷା ଦେବ ବୋଲି ଯୋଗେଶ୍ୱର କହିଛନ୍ତି। ସେହିପରି ଅନ୍ୟତମ ବକ୍ତା ମହନ୍ତ ନଓ୍ବାଲ କିଶୋର ଦାସ୍ ହିନ୍ଦୁମାନଙ୍କୁ ବନ୍ଧୁକ ରଖିବାକୁ କହିଛନ୍ତି। ଲାଇସେନ୍ସ ଥାଉ କି ନ ଥାଉ ବନ୍ଧୁକ ରଖିବାକୁ ସେ ପରାମର୍ଶ ଦେଇଛନ୍ତି। ଏହା ଏକ ଜନଆକ୍ରୋଶ ରାଲି। ଏଠାରେ କୌଣସି ସମ୍ପ୍ରଦାୟ ନୁହେଁ, ଜିହାଦି ତତ୍ତ୍ୱଙ୍କ ବିରୋଧରେ ବାର୍ତ୍ତା ଦିଆଯାଉଛି ବୋଲି ଭିଏଚ୍ପି ମୁଖପାତ୍ର ବିନୋଦ ବଂଶଲ କହିଛନ୍ତି। ଜିହାଦି ତତ୍ତ୍ୱଙ୍କଠାରୁ ରକ୍ଷା ପାଇବା ପାଇଁ ଆତ୍ମରକ୍ଷା କୌଶଳ ଆପଣାଇବା ଜରୁରୀ ବୋଲି ସେ ମତ ଦେଇଛନ୍ତି।
