ନୂଆଦିଲ୍ଲୀ,୮।୧୦: ଉତ୍ତରପ୍ରଦେଶ, ହରିଆଣା ସମେତ ୬ଟି ରାଜ୍ୟରେ ନିର୍ବାଚନ ପାଇଁ ଜୋରସୋରରେ ପ୍ରସ୍ତୁତି ଚାଲିଛି। ୬ଟି ରାଜ୍ୟର ୭ଟି ବିଧାନସଭା ଆସନରେ ଉପନିର୍ବାଚନ ଅନୁଷ୍ଠିତ ହେବାକୁ ଯାଉଛି। ଏହି ଉପନିର୍ବାଚନରେ ନିଜର ବିଜୟ ହାସଲ ପାଇଁ ବିଭିନ୍ନ ରାଜନୈତିକ ଦଳ ଅଣ୍ଟା ଭିଡ଼ିଛନ୍ତି। ବିଭିନ୍ନ ଦଳରୁ ଟିକେଟ ପାଇବାକୁ ଥିବା ସମ୍ଭାବ୍ୟ ପ୍ରାର୍ଥୀଙ୍କ ଚିତ୍ର ସ୍ପଷ୍ଟ ହେବାରେ ଲାଗିଛି। ଇତିମଧ୍ୟରେ ଉତ୍ତରପ୍ରଦେଶ, ହରିଆଣା ଓ ତେଲେଙ୍ଗାନାର ୩ଟି ବିଧାନସଭା ଆସନ ପାଇଁ ପ୍ରାର୍ଥୀଙ୍କ ନାମ ଘୋଷଣା କରାଯାଇଛି। ଶନିବାର ଭାଜପା ପ୍ରାର୍ଥୀଙ୍କ ନାମ ଘୋଷଣା କରିଛି। କଂଗ୍ରେସରୁ ଇସ୍ତଫା ଦେବା ପରେ ଭାଜପାରେ ସାମିଲ ହୋଇଥିବା ଏବଂ ହରିଆଣା ବିଧାନସଭାର ସଦସ୍ୟ କୁଲଦୀପ ବିଷ୍ଣୋଇଙ୍କୁ ଦଳ ଏକ ରିଟର୍ନ ଉପହାର ଦେଇଛି। ଆଦମପୁର ବିଧାନସଭା ଆସନରୁ କୁଲଦୀପଙ୍କ ପୁଅ ଭବ୍ୟ ବିଷ୍ଣୋଇଙ୍କୁ ଭାଜପା ଟିକେଟ ଦେଇଛି। କୁଲଦୀପଙ୍କ ଇସ୍ତଫା ପରେ ଆଦମପୁର ବିଧାନସଭା ଆସନ ଖାଲି ପଡ଼ିଥିଲା। ସେହିପରି ଉତ୍ତରପ୍ରଦେଶର ଲଖିମପୁର ଖେରୀ ଜିଲାର ଗୋଲା ଗୋକରନାଥରୁ ଅରବିନ୍ଦ ଗିରିଙ୍କ ପୁଅ ଅମାନ ଗିରିଙ୍କୁ ପ୍ରାର୍ଥୀ କରାଯାଇଛି। ଅନ୍ୟପଟେ ତେଲେଙ୍ଗାନାରେ ରାଜନୈତିକ ଭିତ୍ତିଭୂମିକୁ ମଜଭୁତ କରିବାକୁ ଚେଷ୍ଟା କରୁଥିବା ଭାଜପା ମନୁୁଗୋଡେ ବିଧାନସଭା ଆସନରୁ କୋମାତିରେଡି ରାଜାଗୋପାଲ ରେଡ୍ଡୀଙ୍କୁ ପ୍ରାର୍ଥୀ କରିଛି।
