ମୋରାଦାବାଦ/ଡେରାଡୁନ୍,୧୩।୧୦: ଉତ୍ତରପ୍ରଦେଶ ପୋଲିସ ଟିମ୍ ଏବଂ ଉତ୍ତରାଖଣ୍ଡ ସୀମାନ୍ତ ଗ୍ରାମର ଅଧିବାସୀଙ୍କ ମଧ୍ୟରେ ସଂଘର୍ଷ ଘଟି ଜଣେ ସ୍ଥାନୀୟ ଭାଜପା ନେତାଙ୍କ ସ୍ତ୍ରୀ ପ୍ରାଣ ହରାଇବା ସହ ଅନ୍ୟ ୫ଜଣ ଆହତ ହୋଇଛନ୍ତି। ଆହତଙ୍କ ମଧ୍ୟରୁ ୪ଜଣ ପୋଲିସ କର୍ମଚାରୀ। ସେମାନଙ୍କ ମଧ୍ୟରୁ ୨ ଜଣଙ୍କ ଦେହରେ ଗୁଳି ବାଜିଥିବା ପୋଲିସ କହିଛି। ବେଆଇନ ବାଲି ଖନନରେ ଲିପ୍ତ ଜଣେ ଅଭିଯୁକ୍ତଙ୍କୁ ଗିରଫ କରିବାକୁ ବୁଧବାର ରାତିରେ ପୋଲିସ ଉତ୍ତରାଖଣ୍ଡର ଉଦ୍ଧାମସିଂ ନଗର ଜିଲାର ଭରତପୁର ଗ୍ରାମକୁ ଯାଇଥିବା ବେଳେ ଗ୍ରାମବାସୀ ବିରୋଧ କରିବାରୁ ସଂଘର୍ଷ ହୋଇଥିଲା। ପୋଲିସ ଟିମ୍ ଭାଜପା ନେତା ତଥା ଯଶପୁରର ବ୍ଲକ ପ୍ରମୁଖ ଗୁରତାଜ ଭୁଲାରଙ୍କ ଘରେ ଚଢ଼ାଉ କରିବାକୁ ଯାଇଥିବା ବେଳେ ବଚସାରୁ ସଂଘର୍ଷ ଘଟିଥିଲା। ପୋଲିସ ଗୁଳିରେ ଭୁଲାରଙ୍କ ସ୍ତ୍ରୀ ଗୁରପ୍ରୀତିଙ୍କ ମୃତ୍ୟୁ ଘଟିଥିଲା।
