ଅହମଦାବାଦ,୨୬।୧୧ : ଗୁଜରାଟ ବିଧାନସଭା ନିର୍ବାଚନ ପାଇଁ ଭାଜପା ଘୋଷଣାପତ୍ର ପ୍ରକାଶ ପାଇଛି। ରାଜ୍ୟରେ ପ୍ରାୟ ତିନି ଦଶନ୍ଧି ଧରି ଶାସନ କରିଆସୁଥିବା ଭାରତୀୟ ଜନତା ପାର୍ଟି ଶନିବାର ଏହା ପ୍ରକାଶ କରିଛି। ସଙ୍କଳ୍ପପତ୍ରରେ ଭାଜପା ୪୦ ଟି ପ୍ରତିଶ୍ରୁତି ଦେଇଛି।
ଯେଉଁଥିରେ ୫ ବର୍ଷରେ ଯୁବବର୍ଗମାନଙ୍କ ପାଇଁ ୨୦ ଲକ୍ଷ ଚାକିରି, ଆଇଆଇଟି, କୃଷି ଭିତ୍ତିଭୂମି ଏବଂ ୪ ଟି ଗୁଜରାଟ ଇନଷ୍ଟିଚ୍ୟୁଟ ଅଫ ଟେକ୍ନୋଲୋଜି (ଜିଆଇଟି) ପ୍ରତିଷ୍ଠା ଲାଗି ପ୍ରତିଶ୍ରୁତି ଦିଆଯାଇଛି। ଏହା ସହିତ ଝିଅଙ୍କୁ ମାଗଣା ସ୍କୁଟି , ୟୁନିଫର୍ମ ସିଭିଲ କୋଡ କମିଟିର ସୁପାରିଶକୁ କାର୍ଯ୍ୟକାରୀ,ଆୟୁଷ୍ମାନ ଭାରତ ଯୋଜନା ଅଧୀନରେ ୫ ଲକ୍ଷ ପର୍ଯ୍ୟନ୍ତ ମିଳୁଥିବା ସ୍ବାସ୍ଥ୍ୟବୀମାକୁ ୧୦ ଲକ୍ଷ କରାଯିବ।
ଏହି ଘୋଷଣାପତ୍ର ମାଧ୍ୟମରେ ଭାଜପା ସମସ୍ତ ବର୍ଗର ଲୋକଙ୍କୁ ଆକର୍ଷିତ କରିବାକୁ ଚେଷ୍ଟା କରିଛି। ଏଥିରେ ମହିଳାମାନଙ୍କ ପ୍ରତି ମଧ୍ୟ ବିଶେଷ ଧ୍ୟାନ ଦିଆଯାଇଛି। ଏହି ଅବସରରେ ଭାଜପା ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା, ରାଜ୍ୟ ମୁଖ୍ୟମନ୍ତ୍ରୀ ଭୁପେନ୍ଦ୍ର ପଟେଲ, ଭାଜପା ରାଜ୍ୟ ସଭାପତି ସିଆର ପାଟିଲଙ୍କ ସମେତ ବହୁ ବରିଷ୍ଠ ନେତା ଉପସ୍ଥିତ ଥିଲେ। ନଡ୍ଡା କହିଛନ୍ତି ଯେ ଭାଜପା ଶାସନ ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ୱରେ ଗୁଜରାଟ କ୍ରମାଗତ ଭାବେ ବିକାଶ କରୁଛି। କେବଳ ଭାଜପା ରାଜ୍ୟର ସାମଗ୍ରିକ ବିକାଶ କରିପାରିବ। କୌଣସି ଭେଦଭାବ ନକରି ଭାଜପା ସବୁବେଳେ ସମସ୍ତ ବିଭାଗର ଲାଭ ପାଇଁ କାର୍ଯ୍ୟ କରିଆସୁଛି।