କୋଲକାତା,୧୩।୯: ପଶ୍ଚିମବଙ୍ଗରେ ମମତା ବାନାର୍ଜୀ ସରକାରଙ୍କ ବିରୋଧରେ ମଙ୍ଗଳବାର ଭାଜପା ପକ୍ଷରୁ କୋଲକାତା ସଚିବାଳୟ ପର୍ଯ୍ୟନ୍ତ ଏକ ‘ନବାନ୍ନା ଚଲୋ’ ଅଭିଯାନ ଆୟୋଜିତ ହୋଇଥିଲା। ଏଥିପାଇଁ ବିଭିନ୍ନ ରାଜ୍ୟରୁ ଭାଜପାର ଅନେକ ନେତା ଓ କର୍ମକର୍ତ୍ତା କୋଲକତା ଓ ହାଓ୍ବଡାରେ ପହଞ୍ଚିଥିଲେ। ଏହି ସମୟରେ କେତେକ ସ୍ଥାନରେ ଭାଜପା କର୍ମକର୍ତ୍ତା ଓ ପୋଲିସ ମଧ୍ୟରେ ହିଂସା ଦେଖାଦେଇଥିବା ବେଳେ ଆଉ କେତେକ ସ୍ଥାନରେ ଭାଜପା ଓ ଟିଏମ୍ସି ସମର୍ଥକ ମୁହାଁମୁହିଁ ହୋଇଛନ୍ତି। ଇତିମଧ୍ୟରେ ପ୍ରଦର୍ଶନକାରୀମାନେ ପୋଲିସର କାର୍ରେ ନିଆଁ ଲଗାଇଥିବା ଦେଖିବାକୁ ମିଳିଛି। ଏତଦ୍ ବ୍ୟତୀତ ହାୱଡାରେ ପ୍ରଦର୍ଶନକାରୀମାନେ ପୋଲିସ ଉପରେ ପଥର ଫିଙ୍ଗିଥିବା ଘଟଣା ମଧ୍ୟ ସାମ୍ନାକୁ ଆସିଛି। ତେବେ ପ୍ରଦର୍ଶନକାରୀଙ୍କୁ ନିୟନ୍ତ୍ରଣ କରିବା ପାଇଁ ପୋଲିସକୁ ଲୁହ ବୁହା ଗ୍ୟାସ ପ୍ରୟୋଗ କରିବାକୁ ପଡ଼ିଛି। ଅନ୍ୟପଟେ ନବାନ୍ନା ମାର୍ଚ୍ଚ ସମୟରେ ସଚିବାଳୟକୁ ଘେରାଉ କରିବାକୁ ଯାଉଥିବା ବେଳେ ଏହାପୂର୍ବରୁ ପଶ୍ଚିମବଙ୍ଗ ବିଧାନସଭାର ବିରୋଧୀଦଳର ନେତା ଶୁଭେନ୍ଦୁ ଅଧିକାରୀ, ଏମ୍ପି ଲକେଟ ଚାଟାର୍ଜୀ ଏବଂ ରାହୁଲ ସିହ୍ନାଙ୍କ ସମେତ ଅନ୍ୟ ନେତା ଓ କର୍ମକର୍ତ୍ତାଙ୍କୁ ପୋଲିସ ହେପାଜତକୁ ନେଇଛି। ସେମାନଙ୍କୁ କୋଲକାତା ଲାଲବଜାର ସ୍ଥିତ ପୋଲିସ ହେଡକ୍ୱାର୍ଟରକୁ ନିଆଯାଇଛି।