କାବୁଲ,୫।୯: ଆଫଗାନିସ୍ତାନର ପଞ୍ଜଶିରରେ ନର୍ଦନ ଆଲାଏନ୍ସ୍ ଏବଂ ତାଲିବାନ ଆତଙ୍କବାଦୀଙ୍କ ମଧ୍ୟରେ ଭୟଙ୍କର ରକ୍ତାକ୍ତ ସଂଘର୍ଷ ଜାରି ରହିଛି। କ୍ଷମତା ଦଖଲ ନେଇ ପଞ୍ଜଶିର ଏବେ ରକ୍ତରେ ଲାଲ ହୋଇଯାଇଛି। ପଞ୍ଜଶିରର ଉତ୍ତର-ପୂର୍ବ ଅଞ୍ଚଳରେ ୬୦୦ ତାଲିବାନୀଙ୍କ ମୃତ୍ୟୁ ଘଟିଛି।
ସେହିପରି ୧୦୦୦ରୁ ଅଧିକ ତାଲିବାନ ଆତଙ୍କବାଦୀ ଆତ୍ମସମର୍ପଣ କରିଥିବା ନର୍ଦନ ଆଲାଏନ୍ସ୍ର ପ୍ରବକ୍ତା ଫହିମ୍ ଦାସ୍ତି ଟୁଇଟ୍ କରି ସୂଚନା ଦେଇଛନ୍ତି। ତେବେ ତାଲିବାନ ପକ୍ଷରୁ ଦାବି କରାଯାଇଛି ଯେ, ପଞ୍ଜଶିରର ୭ ଜିଲାରୁ ୪କୁ ଦଖଲ କରାଯାଇଛି।
ମାତ୍ର ଏହାକୁ ନର୍ଦନ ଆଲାଏନ୍ସ୍ ମୁଖ୍ୟ ଅମରୁଲା ସାଲେହ ଖଣ୍ଡନ କରିଛନ୍ତି। ସେ କହିଛନ୍ତି ପଞ୍ଜଶିରରେ ଇଣ୍ଟରନେଟ୍ ସେବା, ଫୋନ୍ ତଥା ବିଦ୍ୟୁତ୍ ସରବରାହ ଜାରି ରହିଛି। ଏକ କଠିନ ସ୍ଥିତି ସୃଷ୍ଟି ହୋଇଛି। ତେବେ ନର୍ଦନ ଆଲାଏନ୍ସ୍ ନେତା ଆତଙ୍କବାଦୀ ସଂଗଠନ ସମ୍ମୁଖରେ ଆତ୍ମସମର୍ପଣ କରିବେ ନାହିଁ ବୋଲି ସାଲେହ କହିଛନ୍ତି। ଉଭୟ ପକ୍ଷରୁ ବହୁ ଲୋକ ମୃତାହତ ହୋଇଥିବା ସେ କହିଛନ୍ତି।
