ଚଣ୍ଡିଗଡ,୨।୧: ପଞ୍ଜାବ ମୁଖ୍ୟମନ୍ତ୍ରୀ ଭଗଓ୍ବନ୍ତ ମାନଙ୍କ ହେଲିପ୍ୟାଡ ନିକଟରୁ ଏକ ଅଫୁଟା ବୋମା ସେଲ୍ ମିଳିଛି। ସୋମବାର ମାନଙ୍କ ଆମ୍ବ ବଗିଚା ନିକଟରେ ଏହା ପଡିଥିବାର ଦେଖିବାକୁ ମିଳିଛି। ଚଣ୍ଡିଗଡର ପଞ୍ଜାବ ଏବଂ ହରିୟାଣାର ମୁଖ୍ୟମନ୍ତ୍ରୀଙ୍କ ବାସଭବନଠାରୁ କିଛି ଦୂରରେ ଏହାକୁ ଉଦ୍ଧାର କରାଯାଇଛି। ପୋଲିସ ଏହାକୁ ବାଲିବସ୍ତାରେ ଢାଙ୍କି ଦେଇଥିବା ବେଳେ ଉକ୍ତ ଅଞ୍ଚଳକୁ ସିଲ୍ କରାଯାଇଛି। ଅନ୍ୟପଟେ, ବୋମା ନିଷ୍କ୍ରିୟକାରୀ ଦଳ ଘଟଣାସ୍ଥଳରେ ପହଞ୍ଚି ଉକ୍ତ ବୋମାକୁ ଯାଞ୍ଚ କରିବା ସହ ଉଦ୍ଧାର କରିଛି। ଏଥିସହ ଚଣ୍ଡିଗଡ ପୋଲିସ ତଦନ୍ତ ଜାରି ରଖିଛି। ତେବେ ମୁଖ୍ୟମନ୍ତ୍ରୀଙ୍କ ଘର ନିକଟରେ ବୋମା ମିଳିବା କୌଣସି ଏକ ଷଢଯନ୍ତ୍ର କରାଯାଉଥିବା ଆଶଙ୍କା କରାଯାଉଛି।