ବେଙ୍ଗାଲୁରୁ,୨୭।୧୨: କର୍ନାଟକ ସହ ସୀମା ବିବାଦକୁ ନେଇ ମହାରାଷ୍ଟ୍ର ସରକାର ମଙ୍ଗଳବାର ବିଧାନସଭାରେ ଏକ ପ୍ରସ୍ତାବ ଆଗତ କରିଛନ୍ତି। ସର୍ବସମ୍ମତି କ୍ରମେ ଏହା ପାରିତ ହୋଇଛି। ଆଜି ବିଧାନସଭାରେ ମୁଖ୍ୟମନ୍ତ୍ରୀ ଏକନାଥ ଶିନ୍ଦେ ପ୍ରସ୍ତାବ ଉପସ୍ଥାପନ କରିଛନ୍ତି। ଖୁବ ଶୀଘ୍ର ଏହି ପ୍ରସ୍ତାବ କେନ୍ଦ୍ର ସରକାରଙ୍କ ନିକଟକୁ ପଠାଯିବ। ଯେକୌଣସି ପରିସ୍ଥିତିରେ ମହାରାଷ୍ଟ୍ରର ୮୬୫ ମରାଠୀ ଭାଷା ଗ୍ରାମକୁ ଅନ୍ତର୍ଭୁକ୍ତ କରିବା ପାଇଁ ସୁପ୍ରିମକୋର୍ଟରେ ସମସ୍ତ ଆବଶ୍ୟକ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି। ପ୍ରସ୍ତାବରେ କୁହାଯାଇଛି ଯେ, ସୀମା ବିବାଦ ଗ୍ରାମରେ ରହୁଥିବା ଲୋକଙ୍କ ସହ ମହାରାଷ୍ଟ୍ର ସରକାର ସମ୍ପୂର୍ଣ୍ଣ ବଳ ସହ ଠିଆ ହେବେ।
ସୂଚନାଯୋଗ୍ୟ, କର୍ନାଟକ ବିଧାନସଭାରେ ସର୍ବସମ୍ମତି କ୍ରମେ ରାଜ୍ୟର ସ୍ବାର୍ଥ ରକ୍ଷା ପାଇଁ ମୁଖ୍ୟମନ୍ତ୍ରୀ ବାସଭାରାଜ ବୋମ୍ମାଇ ସୀମା ବିବାଦ ଉପରେ ଏକ ପ୍ରସ୍ତାବ ପାରିତ କରିଛନ୍ତି। ଭାଷା ଭିତ୍ତିରେ ଦୁଇ ରାଜ୍ୟର ପୁନର୍ଗଠନ ପରେ ସୀମା ପ୍ରସଙ୍ଗ ୧୯୫୭ରୁ ଆରମ୍ଭ ହୋଇଥିଲା।