ପାଲ୍ଲକଡ଼,୭।୧୧: କେରଳ ରାଜ୍ୟ ପାଲ୍ଲକଡ଼ ଜିଲାର ପେରୁମ୍ବ୍ରାଧୋଡ଼ି ଅଞ୍ଚଳରେ କୁକୁରକୁ ଖାଦ୍ୟ ନ ଦେବାରୁ ଜଣେ ଯୁବକଙ୍କୁ ତାଙ୍କ ସମ୍ପର୍କୀୟ ଭାଇ ପିଟି ହତ୍ୟା କରିଛନ୍ତି। କୋପାମ୍ ପୋଲିସ ଅଭିଯୁକ୍ତ ହକିମ୍ (୨୭)ଙ୍କୁ ଗିରଫ କରିଛି। ହକିମ ପାଳିଥିବା କୁକୁରକୁ ଶୁକ୍ରବାର ତାଙ୍କ ସମ୍ପର୍କୀୟ ଭାଇ ହର୍ଷଦ (୨୧) ଖାଇବାକୁ ଦେଇ ନ ଥିଲେ। ଏଥିରେ ଉତ୍କ୍ଷିପ୍ତ ହୋଇ ହକିମ ହର୍ଷଦଙ୍କୁ କୁକୁର ବନ୍ଧା ବେଲ୍ଟ ଓ କାଠ ଫାଳିଆରେ ନିର୍ଘାତ ପିଟିଥିଲେ।
ଗୁରୁତର ଅବସ୍ଥାରେ ହର୍ଷଦଙ୍କୁ ହସ୍ପିଟାଲ ନିଆଯାଇଥିବାବେଳେ ସେଠାରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଥିଲା। ପଞ୍ଜରା ହାଡ଼ ଭାଙ୍ଗିବା ଏବଂ ଅନ୍ତଃରକ୍ତସ୍ରାବ ଯୋଗୁ ତାଙ୍କର ମୃତ୍ୟୁ ଘଟିଥିବା ପୋଲିସ କହିଛି। ଦୁଇ ଭାଇ ପେରୁମ୍ବ୍ରାଥୋଡ଼ିରେ ଗୋଟିଏ ଘରେ ଏକାଠି ରହି ମୋବାଇଲ କେବୁଲ କାମ କରୁଥିଲେ।
