ଶ୍ରୀନଗର,୨୮ା୪: ଜମ୍ମୁ-କଶ୍ମୀର ମାଛିଲ ସେକ୍ଟରରେ ମୁତୟନ ଥିବା ଜଣେ ଓଡ଼ିଆ ଯବାନଙ୍କୁ ତାଙ୍କ ବିବାହ ପାଇଁ ଘରେ ପହଞ୍ଚାଇବା ଲାଗି ସୀମା ସୁରକ୍ଷା ବଳ (ବିଏସ୍ଏଫ୍) ଏକ ସ୍ବତନ୍ତ୍ର ହେଲିକପ୍ଟର ବ୍ୟବସ୍ଥା କରିଛି। ନୟାଗଡ଼ର ୩୦ ବର୍ଷୀୟ ନାରାୟଣ ବେହେରା ବିଏସ୍ଏଫ୍ରେ କନଷ୍ଟେବଳ ଭାବେ କାର୍ଯ୍ୟରତ। ସେ ମାଛିଲ ସଂଲଗ୍ନ ନିୟନ୍ତ୍ରଣ ରେଖା (ଏଲ୍ଓସି)ରେ କାମ କରୁଛନ୍ତି। ମେ ୨ରେ ତାଙ୍କ ବାହାଘର। ସେ ନିୟୋଜିତ ଥିବା ସ୍ଥାନରୁ ନୟାଗଡ଼ ପ୍ରାୟ ୨,୫୦୦ କିଲୋମିଟର ଦୂର। ହେଲେ ଏଲ୍ଓସିରୁ ତୁରନ୍ତ ଫେରିବା ପାଇଁ ସୁବିଧା ନାହିଁ। ଏ ନେଇ ନାରାୟଣଙ୍କ ପରିବାର ଲୋକେ ୟୁନିଟ କମାଣ୍ଡରଙ୍କୁ ଯୋଗାଯୋଗ କରିଥିଲେ। ବାହାଘରର ସମସ୍ତ ବ୍ୟବସ୍ଥା ସରିଛି। ତାଙ୍କୁ ତୁରନ୍ତ ଘରକୁ ପଠାଇବା ପାଇଁ ଅନୁରୋଧ କରିଥିଲେ। ବିଏସ୍ଏଫ୍ ଆଇଜି ରାଜାବାବୁ ସିଂଙ୍କୁ ଏ ନେଇ ଅଧିକାରୀଙ୍କୁ ଅବଗତ କରାଇଥିଲେ। ରାଜାବାବୁ ଶ୍ରୀନଗରରେ ଥିବା ଚିତା ହେଲିକପ୍ଟରରେ ନାରାୟଣଙ୍କୁ ପଠାଇବା ଲାଗି ବନ୍ଦୋବସ୍ତ କରିବା ପାଇଁ ନିର୍ଦ୍ଦେଶ ଦେଇଛନ୍ତି। ଜଣେ ଯବାନଙ୍କ ପାଇଁ ସୁରକ୍ଷା ବଳର ଏପରି ପଦକ୍ଷେପକୁ ପ୍ରଶଂସା କରାଯାଇଛି।
