ବରଗଡ଼ ଅଫିସ୍,୨୧।୬: ବରଗଡ଼ ଜିଲା ମୁଖ୍ୟ ଡାକ୍ତରଖାନାରେ ସ୍ଥାନୀୟ କ୍ୟାନ୍ସର ରୋଗୀଙ୍କୁ ମିଳୁଥିବା କେମୋଥେରାପି ଚିକିତ୍ସା ଏବେ ବନ୍ଦ ରହିଛି। ଫଳରେ ଜନସାଧାରଣରେ ପୁଣି ଅସନ୍ତୋଷ ପ୍ରକାଶ ପାଇଛି। ଏ ସମ୍ପର୍କରେ ଜିଲା ମୁଖ୍ୟ ଚିକିତ୍ସାଧିକାରୀ ଡା. ଅରୁଣ କୁମାର ପାତ୍ରଙ୍କୁ ପଚାରିବାରୁ କ୍ୟାନ୍ସର ରୋଗୀଙ୍କ କେମୋଥେରାପି ଚିକିତ୍ସା ଚାଲିଛି। ବେଳେବେଳେ ଆବଶ୍ୟକ ଔଷଧ ଅଭାବ ଯୋଗୁ ରୋଗୀଙ୍କ କେମୋଥେରାପି ହୋଇ ପାରୁ ନ ଥିଲେ ସୁଦ୍ଧା ପରବର୍ତ୍ତୀ ସମୟରେ ସେମାନଙ୍କୁ ସେହି ସ୍ବାସ୍ଥ୍ୟସେବା ଯୋଗାଇ ଦିଆଯାଉଛି ବୋଲି କହିଥିଲେ ।
ସୋମବାର ଖେଦାପାଲି ଗ୍ରାମର ତୁଳାଧର ପ୍ରଧାନ କେମୋଥେରାପି ପାଇଁ ଜିଲା ମୁଖ୍ୟ ଡାକ୍ତରଖାନାକୁ ଆସିଥିଲେ। ମାତ୍ର ତାଙ୍କୁ ସେହି ସେବା ମିଳିପାରି ନ ଥିବା ସେ କହିଛନ୍ତି। ଆବଶ୍ୟକ ଔଷଧ ଅଭାବ ଦର୍ଶାଇ ଗତ ୨ସପ୍ତାହ ହେଲା ତାଙ୍କୁ ଉକ୍ତ ସ୍ବାସ୍ଥ୍ୟସେବା ଯୋଗାଇ ଦିଆଯାଇ ନ ଥିବା ତୁଳାଧର କହିଛନ୍ତି। ଅନ୍ୟପଟେ ବୁର୍ଲା କିମ୍ବା ଅନ୍ୟ କୌଣସି ଡାକ୍ତରଖାନାକୁ ଯିବାକୁ ବିଭାଗୀୟ ଡାକ୍ତରମାନେ କହୁଛନ୍ତି। ମାତ୍ର ଲକ୍ଡାଉନ କଟକଣା ଯୋଗୁ ଗାଡ଼ି ଚଳାଚଳ ବନ୍ଦ ରହିଥିବାରୁ ବାହାରକୁ ଯିବା ସମ୍ଭବ ହେଉ ନ ଥିବା ସେ ପ୍ରକାଶ କରିଛନ୍ତି।