କେନ୍ଦୁଝର, ୧୯ା୨ (ସ୍ବ.ପ୍ର.)-ବ୍ୟାପକ ଧରପଗଡ ସତ୍ତ୍ୱେ କେନ୍ଦୁଝର ଜିଲା ଦେଇ ବାହାର ରାଜ୍ୟ ଓ ଦେଶକୁ ଗୋଚାଲାଣ ବନ୍ଦ ହେଉ ନ ଥିବାରୁ ଅସନ୍ତୋଷ ବଢିବାରେ ଲାଗିଛି। ଏହାକୁ ରୋକିବା ପାଇଁ ପ୍ରଶାସନ ପକ୍ଷରୁ ଆଦୌ ଦୃଢ ପଦକ୍ଷେପ ନିଆଯାଉ ନ ଥିବାରୁ ଗୋ-ବେପାରୀ ମାନେ ବିଭିନ୍ନ ଉପାୟରେ ପଶୁ ନିର୍ଯାତନା ଆଇନକୁ ଖୋଲା ଖୋଲି ଉଲଘଂନ କରି ଗୋ ଚାଲାଣ କରୁଛନ୍ତି। କେତେବେଳେ ରାସ୍ତାରେ ଚଲାଇ ଚଲାଇ ତ କେତେବେଳେ କଣ୍ଟେନର ଟ୍ରକ ଆଦିରେ ଲୋଡ କରି ଚାଲାଣ କରୁଛନ୍ତି। ଫଳରେ ଏହାକୁ ନେଇ ଘୋର ଅସନ୍ତୋଷ ବୃଦ୍ଧି ପାଇବାରେ ଲାଗୁଥିବା ବେଳେ ଏବେ ଗୋ ରକ୍ଷା ପାଇଁ ସାଧାରଣ ଲୋକ ରାସ୍ତା କୁ ଓହ୍ଲାଇବାକୁ ବାଧ୍ୟ ହୋଇଛନ୍ତି ା
ଗୁରୁବାର କାଞ୍ଜିପାଣି ଥାନା ଅନ୍ତର୍ଗତ କାଞ୍ଜିପାଣି ଘାଟିରେ ଏକ ଗୋରୁ ବୋଝେଇ ଟ୍ରକକୁ ବଜରଙ୍ଗ ଦଳ ତଥା ଗୋ ରକ୍ଷା ସାମାଜିକ କର୍ମୀ ମାନେ ଧରିଛନ୍ତି। ଦୟନୀୟ ଅବସ୍ଥାରେ ସମ୍ବଲପୁର ଆଡୁ ପଶ୍ଚିମବଙ୍ଗ ଅଭିମୁଖେ ଏନ୍ଏଚ୍ ୪୯ ରେ ଯାଉଥିବା ପଶ୍ଚିମବଙ୍ଗ ନମ୍ବର ଥିବା ଟ୍ରକରେ ୨୮ ଟି ଗୋରୁକୁ ନିର୍ଦ୍ଦୟ ଭାବରେ ଲୋଡ କରି ନେଉଥିବା ବେଳେ ଅଟକାଇଥିଲେ ା ସେଥିରୁ ଗୋଟିଏ ଗୋରୁ ମୃତ୍ୟୁବରଣ କରିଥିଲା। ସରୋଜ କୁମାର ନାୟକ, ପ୍ରକାଶ ମଲ୍ଲିକ, ସଞ୍ଜୟ ମହାନ୍ତି, କିରଣବାଳା ନାୟକ, ରଞ୍ଜିତ ବାରିକଙ୍କ ସମେତ ଅନ୍ୟ ଗୋ-ରକ୍ଷକମାନେ ଗୋରୁଙ୍କୁ ଉଦ୍ଧାର କରି ସେମାନଙ୍କୁ ଖାଦ୍ୟ ପାନୀୟ ଦେବା ସହ ସେବାଶୂଶ୍ରୂଷା କରିବା ସହ ପୋଲିସ କୁ ଜଣାଇଥିଲେ। ପୂର୍ବରୁ ଏଭଳି ବେଆଇନ ଗୋରୁ ବୋଝେଇ କଣ୍ଟେନର, ଟ୍ରକ, ପିକଅପ ଭ୍ୟାନ ଜବତ ହୋଇଥିବା ବେଳେ ଦୁର୍ଘଟଣାରେ ଗୋରୁଗାଇ ମୃତ୍ୟୁ ଭଳି ଘଟଣା ଘଟିଥିବାରୁ ବଜରଙ୍ଗ ଦଳ, ଗୋ ରକ୍ଷକ ମାନେ ତୀବ୍ର ଅସନ୍ତୋଷ ବ୍ୟକ୍ତି କରି ଆସୁଛନ୍ତି ା ଏଣୁ ଏହାକୁ ରୋକା ନ ଗଲେ ଆଗାମୀ ଦିନରେ କେନ୍ଦୁଝର ବାସୀ ତଥା ହିନ୍ଦୁ ସମାଜ ଏନେଇ ସମବେତ ବିରୋଧ କରିବାକୁ ବାଧ୍ୟ ହେବ ବୋଲି ଚେତାବନୀ ଦେଇଛନ୍ତି ା