ନୂଆଦିଲ୍ଲୀ, ୧୮ା୮: ସୁପ୍ରିମକୋର୍ଟଙ୍କ ତତ୍ତ୍ୱାବଧାନରେ ପେଗାସସ୍ ଗୁପ୍ତଚରଗିରି ଅଭିଯୋଗର ତଦନ୍ତ କରାଯିବା ପାଇଁ ଦାଖଲ ପିଟିଶନ ଆଧାରରେ କେନ୍ଦ୍ର ସରକାରଙ୍କୁ ଜବାବ ମାଗିଛନ୍ତି ସର୍ବୋଚ୍ଚ ଅଦାଲତ। ୧୦ ଦିନ ମଧ୍ୟରେ ଏହାର ଉତ୍ତର ରଖିବାକୁ ଭାରତର ପ୍ରଧାନ ବିଚାରପତି (ସିଜେଆଇ) ଏନ୍. ଭି. ରମାନାଙ୍କ ନେତୃତ୍ୱରେ ଗଠିତ ଖଣ୍ଡପୀଠ କେନ୍ଦ୍ରକୁ ମଙ୍ଗଳବାର ନୋଟିସ୍ ଜାରି କରିଛନ୍ତି। ଏ ନେଇ କେନ୍ଦ୍ର ସରକାରଙ୍କ ପକ୍ଷରୁ ୨ ପୃଷ୍ଠା ସମ୍ବଳିତ ସୀମିତ ସତ୍ୟପାଠ ଦାଖଲ କରାଯାଇଥିଲା। ତେବେ ଦାଖଲ ବିଭିନ୍ନ ପିଟିଶନ ମାଧ୍ୟମରେ ଉଠିଥିବା ପ୍ରସଙ୍ଗ ବାବାଦରେ ଏହି ସତ୍ୟପାଠ ଯଥେଷ୍ଟ ସନ୍ତୋଷଜନକ ନୁହେଁ ବୋଲି ଖଣ୍ଡପୀଠରେ ଥିବା ଜଷ୍ଟିସ୍ ସୂର୍ଯ୍ୟ କାନ୍ତ ଏବଂ ଅନିରୁଦ୍ଧ ବୋଷ ଦର୍ଶାଇଥିଲେ। ଏହି ପ୍ରସଙ୍ଗ ଜାତୀୟ ନିରାପତ୍ତା ସମ୍ବନ୍ଧିତ ହୋଇଥିବାରୁ ସବୁକିଛି ସତ୍ୟପାଠରେ ଦର୍ଶାଯାଇପାରିବ ନାହିଁ ବୋଲି ଶୁଣାଣିବେଳେ କେନ୍ଦ୍ର ପକ୍ଷରୁ କୁହାଯାଇଥିଲା। ସରକାର କେଉଁ ସଫ୍ଟଓ୍ବେର ବ୍ୟବହାର କରୁଛନ୍ତି କି ନାହିଁ ତାହା ସର୍ବସାଧାରଣରେ ପ୍ରକାଶ କରିବା ପରିବର୍ତ୍ତେ ସ୍ବାଧୀନ ଓ ନିରପେକ୍ଷ ତଦନ୍ତ କରୁଥିବା ଏକ ବୈଷୟିକ କମିଟିକୁ ସମ୍ପୂର୍ଣ୍ଣ ବିବରଣୀ ଦେବାକୁ କେନ୍ଦ୍ର ପ୍ରସ୍ତୁତ ଥିବା ସଲିସିଟର ଜେନେରାଲ ତୁଷାର ମେହଟା କହିଥିଲେ। ଜାତୀୟ ନିରାପତ୍ତା କିମ୍ବା ପ୍ରତିରକ୍ଷା ବ୍ୟବସ୍ଥାକୁ କ୍ଷତି ପହଞ୍ଚାଉଥିବା ଭଳି କୌଣସି ବିବରଣୀ ଅଦାଲତ ଚାହଁାନ୍ତି ନାହିଁ ବୋଲି ଖଣ୍ଡପୀଠ କହିଥିଲେ।