ପାପଡ଼ାହାଣ୍ଡି,୮।୧୦(ଡି.ଏନ୍.ଏ.): ନବରଙ୍ଗପୁର ଜିଲା ପାପଡ଼ାହାଣ୍ଡି ବ୍ଲକ ସଦର ମହକୁମା ନୂଆସାହିର ଚନ୍ଦନ କୁମାର ନାୟକ ଚଳିତ ବର୍ଷ ଓସିଏସ୍ ପରୀକ୍ଷାରେ ଉତ୍ତୀର୍ଣ୍ଣ ହୋଇ ନବରଙ୍ଗପୁର ଜିଲା ଓ ପାପଡ଼ାହାଣ୍ଡି ବ୍ଲକ ପାଇଁ ଗୌରବ ଆଣିଛନ୍ତି। ସେ ୧୪୯ ର଼୍ୟାଙ୍କ୍ରେ ରହିଛନ୍ତି। ୨ ବର୍ଷ ଧରି ଭୁବନେଶ୍ୱରରେ ରହି ସେ ପରୀକ୍ଷା ପାଇଁ ପ୍ରସ୍ତୁତ ହେଉଥିଲେ। ଶୁକ୍ରବାର ଫଳ ପ୍ରକାଶ ପାଇବା ପରେ ପାପଡ଼ାହାଣ୍ଡିରେ ଖୁସିର ଲହରି ଖେଳଯାଇଛି। ଚନ୍ଦନଙ୍କ ବାପା ଜଗନ୍ନାଥ ନାୟକ ବଡ଼ କୁମୁଲି ପ୍ରାଣୀ ଚିକିତ୍ସାଳୟରେ ଏଲ୍ଆଇ ଅଛନ୍ତି।
ବାପାଙ୍କ ଠାରୁ ଓଏଏସ୍ ପାଇଁ ପ୍ରେରଣା ପାଇଥିଲି। ଏହା ତାଙ୍କର ସ୍ବପ୍ନ ଥିଲା। ତାହା ସାକାର କରିଛି। ବାପା ଜଣେ ଚତୁର୍ଥ ଶ୍ରେଣୀ କର୍ମଚାରୀ ଥିଲେ। ତେଣୁ ପ୍ରଥମ ଶ୍ରେଣୀ କର୍ମଚାରୀ ହେବାକୁ ଚାହୁଁ ଥିଲି ବୋଲି ଚନ୍ଦନ ଧରିତ୍ରୀକୁ ପ୍ରତିକ୍ରିୟା ଦେଇ କହିଛନ୍ତି। ଦିନକୁ ୭ରୁ ୮ ଘଣ୍ଟା ପରିଶ୍ରମ କରିବା ସହ ପରିବାର ଛାଡି ଭୁବନେଶ୍ୱର ରହି ପରୀକ୍ଷା ପ୍ରସ୍ତୁତି କରୁଥିଲେ ବୋଲି ଚନ୍ଦନ କହିଛନ୍ତି। କରୋନା ପୂର୍ବରୁ ୨୦୧୯ରେ ପ୍ରିଲିମିନାରୀରେ ସଫଳତା ପାଇ ନ ଥିଲେ ମଧ୍ୟ ମନୋବଳ ଭାଙ୍ଗି ନ ଥିଲା। ଅଧିକ ପରିଶ୍ରମ କରିଥିଲି। ଓଏଏସ୍ ପାଇବା ନେଇ ଆତ୍ମବିଶ୍ୱାସ ଥିଲାବୋଲି ସେ କହିଛନ୍ତି। ଆଦିବାସୀ ଅଞ୍ଚଳରୁ ଆସିଛି, ଏଠାରେ ଲୋକଙ୍କ ଅନେକ ସମସ୍ୟା ରହିଛି। ସ୍ବାସ୍ଥ୍ୟ ସମସ୍ୟା ବେଶୀ। ଆଦିବାସୀଙ୍କ ଭାଷା ବୁଝି ପାରୁଥିବାରୁ ଲୋକଙ୍କ ସମସ୍ୟା ଠିକ ଭାବରେ ଉପସ୍ଥାପନା କରି ତାହାର ସମାଧାନ କରାଇ ପାରିବି ବୋଲି ଚନ୍ଦନ କହିଛନ୍ତି। ଆତ୍ମ ବିଶ୍ୱାସ, ବାପା, ମା, ବଡ଼ ଭଉଣୀ, ଭିଣୋଇ ଏବଂ ଗୁରୁଜନଙ୍କୁ ଚନ୍ଦନ ନିଜ ସଫଳତାର ଶ୍ରେୟ ଦେଇଛନ୍ତି।
