ନୂଆଦିଲ୍ଲୀ,୧୮।୪(ପି.ଟି.): ବିରୋଧୀଙ୍କୁ ସମାଲୋଚନା କରିବା ଲାଗି କେନ୍ଦ୍ରର ଭାଜପା ନେତୃତ୍ୱାଧୀନ ସରକାର ଜାତିଭିତ୍ତିକ ରାଜନୀତି କରିବା ସହ ଦେଶରେ ସାମାଜିକ-ଅର୍ଥନୈତିକ ଓ ଜାତି ଜନଗଣନାକୁ ଅଟକାଇଥିବା କଂଗ୍ରେସ ସୋମବାର ଅଭିଯୋଗ କରିଛି। ଅବହେଳିତ ବର୍ଗ ଫମ୍ପା ପ୍ରତିଶ୍ରୁତି ନୁହେଁ, ଅର୍ଥନୈତିକ ଓ ରାଜନୈତିକ କ୍ଷମତା ଚାହାନ୍ତି ବୋଲି କଂଗ୍ରେସ ନେତା ରାହୁଲ ଗାନ୍ଧୀ କହିବା ସହ ୫୦ ପ୍ରତିଶତ କୋଟା ସୀମା ହଟାଇଦେବାକୁ ଆହ୍ବାନ ଦେଇଛନ୍ତି। ସଂଖ୍ୟା ଆଧାରରେ ଦଳିତ ଓ ଜନଜାତିଙ୍କ ପାଇଁ ସଂରକ୍ଷଣ ବ୍ୟବସ୍ଥା ରଖିବାକୁ ସେ ଦାବି କରିଛନ୍ତି। ସାନି ଜାତିଭିତ୍ତିକ ଜନଗଣନା ଦାବିରେ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖାର୍ଗେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ପତ୍ର ଲେଖିଛନ୍ତି। ଅନ୍ୟାନ୍ୟ ପଛୁଆ ବର୍ଗଙ୍କ ଅର୍ଥପୂର୍ଣ୍ଣ ସାମାଜିକ ନ୍ୟାୟ ଏବଂ ସଶକ୍ତୀକରଣ କାର୍ଯ୍ୟକ୍ରମ ପାଇଁ ଭରସାଯୋଗ୍ୟ ଡାଟାବେସ୍ ଅତି ଜରୁରୀ ବୋଲି ଖାର୍ଗେ ତାଙ୍କ ପତ୍ରରେ ଉଲ୍ଲେଖ କରିଛନ୍ତି। ପୂର୍ବରୁ ଖାର୍ଗେ ଓ ଅନ୍ୟ କଂଗ୍ରେସ ନେତାମାନେ ପାର୍ଲାମେଣ୍ଟର ଉଭୟ ଗୃହରେ ଜାତି ଜନଗଣନା ପ୍ରସଙ୍ଗ ଅନେକ ଥର ଉଠାଇଛନ୍ତି। ଅନ୍ୟ ବିରୋଧୀ ଦଳଗୁଡ଼ିକ ମଧ୍ୟ ଜାତି ଜନଗଣନା ପାଇଁ ଦାବି କରିଆସୁଥିବା କଂଗ୍ରେସ ଅଧ୍ୟକ୍ଷ କହିଛନ୍ତି।
୨୦୧୧-୧୨ରେ ଉପା ସରକାର ସାମାଜିକ ଅର୍ଥନୈତିକ ଓ ଜାତି ଜନଗଣନା କରିଥିଲା। ପ୍ରାୟ ୨୫ କୋଟି ପରିବାରରୁ ଏନେଇ ତଥ୍ୟ ସଂଗ୍ରହ କରାଯାଇଥିଲା। ୨୦୧୪ ମେ’ରେ ଭାଜପା ନେତୃତ୍ୱାଧୀନ ସରକାର କ୍ଷମତାକୁ ଆସିବା ପରେ କଂଗ୍ରେସ ଓ ଅନ୍ୟ ଦଳର ଏମ୍ପିମାନଙ୍କ ଦାବି ସତ୍ତ୍ୱେ ଉକ୍ତ ଜାତିଭିତ୍ତିକ ତଥ୍ୟ ପ୍ରକାଶ ପାଇପାରିଲା ନାହିଁ ବୋଲି ଖାର୍ଗେ କହିଛନ୍ତି। ପ୍ରତି ଦଶ ବର୍ଷରେ ହେଉଥିବା ଜନଗଣନା ୨୦୨୧ରେ ହେବାକୁ ଥିବାବେଳେ ତାହା ଏପର୍ଯ୍ୟନ୍ତ ହୋଇନାହିଁ। ତୁରନ୍ତ ଜନଗଣନା ସହ ବିସ୍ତୃତ ଜାତି ଗଣନା କରାଯାଉ ବୋଲି କଂଗ୍ରେସ ଦାବି କରିଛି।