କେନ୍ଦୁଝର, ୭ା୮(ଡି.ଏନ୍.ଏ.)-କେନ୍ଦୁଝର ଜିଲାରେ କରୋନା ଆକ୍ରାନ୍ତଙ୍କ ସଂଖ୍ୟା ଦିନକୁ ଦିନ ବଢୁ ଥିବାବେଳେ ଗୁରୁବାର ଗୋଟିଏ ଦିନରେ ୫୬ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି। ସେଥିମଧ୍ୟରୁ ୫୨ଜଣ ସ୍ଥାନୀୟ ସଂକ୍ରମଣ ୪ଜଣ ବିଭିନ୍ନ ଟିଏମ୍ସିରୁ ଅଛନ୍ତି ବୋଲି ଜିଲାପାଳ ଆଶିଷ ଠାକ୍ରେ ଏକ ଖବରଦାତା ସମ୍ମିଳନୀରେ ପ୍ରକାଶ କରିଛନ୍ତି। ଆନନ୍ଦପୁର ସବ୍ଡିଭିଜନରେ କରୋନା ସଂକ୍ରମଣ ଏବେ ବଢିବାରେ ଲାଗିଛି। ଆନନ୍ଦପୁର ପୌରପାଳିକାରେ ୧୬୦ଜଣ, ଫକୀରପୁର ଅଞ୍ଚଳରେ ୨୯, ହାଟଡିହି ବ୍ଲକରେ ୧୧୨ଜଣ ଏବଂ ଘସିପୁରା ବ୍ଲକରେ ୧୫୦ଜଣ କରୋନାରେ ଆକ୍ରାନ୍ତ ହୋଇଛନ୍ତି। ଏହି ବ୍ୟକ୍ତିମାନଙ୍କ ନିକଟରେ କୌଣସି ଲକ୍ଷଣ ଦେଖା ଦେଇନଥିବାବେଳେ ସେମାନେ ସମସ୍ତେ ପୂର୍ବ ଆକ୍ରାନ୍ତଙ୍କ ସହ ସଂପୃକ୍ତ ବୋଲି କହିଥିଲେ। କରୋନାକୁ ପ୍ରତିହତ କରିବା ପାଇଁ ଜିଲା ପ୍ରଶାସନ ପକ୍ଷରୁ ବିଭିନ୍ନ ପ୍ରତିକାର ବ୍ୟବସ୍ଥା କରାଯାଉଥିବାବେଳେ ଜିଲାରେ ଏବେ ଟେଷ୍ଟିଂକୁ ଯଥେଷ୍ଟ ଅଧିକା କରାଯାଇଛି। ଜିଲାରେ ବ୍ୟାପକ କୋଭିଡ କେୟାର ସେଣ୍ଟର ପ୍ରତିଷ୍ଠା କରାଯାଇ ସେଠାରେ ସ୍ବଳ୍ପ ଲକ୍ଷଣ ଥିବା ବା ଆଦୌ ଲକ୍ଷଣ ନଥିବା ରୋଗୀମାନଙ୍କୁ ଭର୍ତ୍ତି କରାଯିବ ବୋଲି ଜିଲାପାଳ କହିଥିବାବେଳେ ବର୍ତ୍ତମାନ ଜିଲାରେ ଏକ ହଜାର ଶଯ୍ୟା ରହିଛି। ଜିଲାପାଳଙ୍କ ଏହି ଖବରଦାତା ସମ୍ମିଳନୀରେ ଜିଲା ସୂଚନା ଓ ଲୋକସଂପର୍କ ଅଧିକାରୀ ସଂଜୀବ ବାରିକ ଉପସ୍ଥିତ ଥିଲେ।