ନୂଆଦିଲ୍ଲୀ, ୧୦ା୩: ୨୦୧୮ ମସିହାର ନ୍ୟାଶନାଲ ଷ୍ଟକ୍ ଏକ୍ସଚେଞ୍ଜ୍(ଏନ୍ଏସ୍ଇ)ର କୋ-ଲୋକେଶନ ଘଟଣାର ତଦନ୍ତରେ ମନ୍ଥରଗତିକୁ ନେଇ କେନ୍ଦ୍ରୀୟ ତଦନ୍ତକାରୀ ବ୍ୟୁରୋ (ସିବିଆଇ) ଉପରେ କ୍ଷୁବ୍ଧ ହୋଇଛନ୍ତି ଦିଲ୍ଲୀର ଏକ କୋର୍ଟ। ଏହା ଏକ ବଡ଼ ଧରଣର ଦୁର୍ନୀତି। ଏହା ଦ୍ୱାରା ଦେଶର ପ୍ରତିଷ୍ଠା ବିପଦରେ ପଡ଼ିଛି। ଯଦି ତଦନ୍ତ ବର୍ଷ ବର୍ଷ ଧରି ଚାଲେ ତେବେ ନିବେଶକମାନେ ଚାଇନା ମୁହଁା ହେବେ ବୋଲି ସ୍ବତନ୍ତ୍ର ବିଚାରପତି ସଞ୍ଜୀବ ଅଗ୍ରଓ୍ବାଲ କହିଛନ୍ତି। ଏଥିସହ ଏନ୍ଏସ୍ଇର ପୂର୍ବତନ ଗ୍ରୁପ୍ ଅପରେଟିଂ ଅଫିସର (ଜିଓଓ) ଆନନ୍ଦ ସୁବ୍ରମଣ୍ୟମଙ୍କୁ ମାର୍ଚ୍ଚ ୨୩ ପର୍ଯ୍ୟନ୍ତ ବିଚାର ବିଭାଗୀୟ ହାଜତକୁ ପଠାଯାଇଛି। ସୂଚନାଯୋଗ୍ୟ, ସୁବ୍ରମଣ୍ୟମ ଏନ୍ଏସ୍ଇର ପୂର୍ବତନ ସିଇଓ ଚିତ୍ରା ରାମକ୍ରିଷ୍ଣାଙ୍କ ସହଯୋଗୀ। ଏହା ପୂର୍ବରୁ ଚିତ୍ରାଙ୍କୁ ମାର୍ଚ୍ଚ ୧୪ ପର୍ଯ୍ୟନ୍ତ ସିବିଆଇ ରିମାଣ୍ଡରେ ନେଇଛି।
ଦେଶର ବୃହତ୍ତମ ଷ୍ଟକ୍ ଏକ୍ସଚେଞ୍ଜରେ ଗୁରୁତର ଅନିୟମିତତା ହୋଇଥିବା ଅଭିଯୋଗରେ ଚିତ୍ରାଙ୍କୁ ଗିରଫ କରାଯାଇଛି। ସେ ତଥାକଥିତ ହିମାଳୟ ଯୋଗୀଙ୍କ ଦ୍ୱାରା ପ୍ରଭାବିତ ହୋଇ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଉଥିଲେ, ଯେଉଁଥିପାଇଁ ଏନ୍ଏସ୍ଇର ବିପୁଳ କ୍ଷତି ଘଟିଛି। ଚିତ୍ରାଙ୍କୁ ପରାମର୍ଶ ଦେଉଥିବା ‘ଯୋଗୀ’ ଭାବେ ସିବିଆଇ ସୁବ୍ରମଣ୍ୟମଙ୍କୁ ଚିହ୍ନଟ କରିଥିଲା।