ନୂଆଦିଲ୍ଲୀ, ୨୩।୮ : କେନ୍ଦ୍ରରେ କଂଗ୍ରେସ ସରକାର ବହୁବର୍ଷ ଧରି ରହିଥିଲେ। ଏହି ସମୟରେ ପାକିସ୍ତାନ ନିଜ ଇଛା ଅନୁସାରେ ଯେବେ ଚାହୁଁଥିଲା ଲଗାତାର ଆତଙ୍କବାଦୀ ଆକ୍ରମଣ କରୁଥିଲା ବୋଲି ଭାଜପା ରାଷ୍ଟ୍ରୀୟ ଅଧ୍ୟକ୍ଷ ଜେ.ପି.ନଡ୍ଡା ଅଭିଯୋଗ କରିଛନ୍ତି। ମଙ୍ଗଳବାର ଦିଲ୍ଲୀରେ ’ମୋଦି ଆଟ୍ ଦି ରେଟ୍ ୨୦’ କାର୍ଯ୍ୟକ୍ରମକୁ ସମ୍ବୋଧିତ କରି ନଡ୍ଡା ଏଭଳି କହିଛନ୍ତି। କୋଝିକୋଡେରେ ଆୟୋଜିତ ଏକ ସାଧାରଣ କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଥିଲେ ଯେ ପାକିସ୍ତାନ ଯାହା କରିଛି ତାହାର ଉପଯୁକ୍ତ ଜବାବ ସର୍ଜିକାଲ ଷ୍ଟ୍ରାଇକରେ ଦିଆଯାଇଛି। ମୋଦିଙ୍କ ଏହି ବିବୃତ୍ତି ସମ୍ପର୍କରେ ନଡ୍ଡା ଗୁରୁତ୍ୱାରୋପ କରିଛନ୍ତି।
ନଡ୍ଡା କହିଛନ୍ତି, ମୋଦି ’ଗୋଟିଏ ଜୀବନ ଗୋଟିଏ ଲକ୍ଷ୍ୟ’ ସହିତ ଅର୍ଥପୂର୍ଣ୍ଣ ଭାବରେ ଜୀବନଯାପନ କରନ୍ତି ଏବଂ ପ୍ରତ୍ୟେକ ମୁହୂର୍ତ୍ତ ଦେଶର ସେବା ପାଇଁ ଉତ୍ସର୍ଗୀକୃତ ରହିଛନ୍ତି। ଏହା କେବଳ କହିବା କଥା ନୁହେଁ, ଆମେ ସମସ୍ତେ ତାଙ୍କୁ ଏଭଳି ଭାବେ ଦେଖୁଛୁ। ପ୍ରଧାନମନ୍ତ୍ରୀଙ୍କର ଲୋକପ୍ରିୟତା ଦିନକୁ ଦିନ, ପ୍ରତ୍ୟେକ ମୁହୂର୍ତ୍ତରେ, ପ୍ରତିବର୍ଷ ବୃଦ୍ଧି ପାଉଛି। ଯଦି ଏକ ସର୍ଭେ କରାଯାଏ ଦେଖାଯିବ ଯେ ବିଜୟ ଆସନ ସଂଖ୍ୟା ମଧ୍ୟ ବଢ଼ିବାରେ ଲାଗିଛି।
ମୋଦିଙ୍କର ପଚାଶ ବର୍ଷର ସାର୍ବଜନୀକ ଜୀବନ, କୋଡ଼ିଏ ବର୍ଷର ପ୍ରଶାସନିକ ଜୀବନରେ କୌଣସି ଦୁର୍ନୀତି ନାହିଁ। ସେ ଜୀବନରେ ଅନେକ ଜିନିଷ ବଦଳାଇବାକୁ ଚେଷ୍ଟା କରିଛନ୍ତି। ପ୍ରଧାନମନ୍ତ୍ରୀଙ୍କ ଯୋଗୁ ରାଜନୀତିର ଦୃଷ୍ଟିକୋଣ ମଧ୍ୟ ବଦଳିଥିବା ନଡ୍ଡା କହିଛନ୍ତି।
ନଡ୍ଡା ଗୁରୁତ୍ୱାରୋପ କରିଛନ୍ତି, ପ୍ରଧାନମନ୍ତ୍ରୀ ସଂସ୍କୃତିକୁ ଯୋଡ଼ିଛନ୍ତି, ଭାରତର ସାଂସ୍କୃତିକ ଐତିହ୍ୟକୁ ବିଶ୍ୱ ସମ୍ମୁଖରେ ରଖିଛନ୍ତି। ତାଙ୍କ ଯୋଗୁ ଭାରତର ଗୋଟିଏ ଜିଲ୍ଲା, ଗୋଟିଏ ଉତ୍ପାଦ ସାରା ପୃଥିବୀରେ ପହଞ୍ଚି ପାରିଛି ବୋଲି ନଡ୍ଡା କହିଛନ୍ତି।
