ନୂଆଦିଲ୍ଲୀ,୨୨।୭ (ଅଭୟ ଦାଶ): ଗତ କିଛିଦିନ ହେବ ଅନ୍ତର୍ଜାତୀୟ ବଜାରରେ ପାମ୍ ଅଏଲର ଦର ବୃଦ୍ଧି ପାଇଚାଲିଛି। ଏପରିକି ପାମ୍ ଅଏଲର ଦର ଗତ ୪ ମାସର ସର୍ବୋଚ୍ଚସ୍ତରରେ ପହଞ୍ଚତ୍ଛି। ବିଶେଷକରି ମାଲେସିଆରେ ପାମ୍ ଅଏଲର ୪୦୪୩ ରିଙ୍ଗିଟ୍ ପାର ହୋଇଯାଇଛି। ଅପରପକ୍ଷରେ ସାଧାରଣତଃ ସେପ୍ଟେମ୍ବର ତ୍ରୈମାସିକରେ ମାଲେସିଆର ପାମ୍ ଉତ୍ପାଦନ ହ୍ରାସ ପାଇଥାଏ। ଏହି ସମୟ ମଧ୍ୟରେ ଅନ୍ତର୍ଜାତୀୟ ବଜାରର ଦର ସହ ପାମ୍ ଅଏଲର ଚାହିଦା ମଧ୍ୟ ବୃଦ୍ଧି ପାଇଥାଏ। ଏଣୁ ଚାହିଦା ତୁଳନାରେ ଯୋଗାଣ ହ୍ରାସ ଯୋଗୁ ମୂଲ୍ୟ ବୃଦ୍ଧି ଏକ ନିୟମିତ ପ୍ରକ୍ରିୟା ହୋଇଥିବାବେଳେ ଦର ବୃଦ୍ଧି ଆମଦାନୀ ଦେଶଗୁଡ଼ିକ ପାଇଁ ମିଶ୍ର ପ୍ରତିକ୍ରିୟା ସୃଷ୍ଟି କରିଥାଏ। ସେହିଭଳି ଆମଦାନୀ ଦେଶ ଭାବେ ଭାରତର ପାମ୍ ଅଏଲ ଇମ୍ପୋର୍ଟ ପ୍ରାୟ ୫୬% ବୃଦ୍ଧି ହୋଇଛି। ଏହି ସମୟ ମଧ୍ୟରେ ଭାରତର ତୈଳ ଆମଦାନୀ ବିଗତ ୩ମାସର ସର୍ବୋଚ୍ଚସ୍ତରରେ ରହିଛି। କେବଳ ପାମ୍ କି ସୋୟା ନୁହେଁ ସନ୍ଫ୍ଲାୱାର ତେଲର ଦାମ ମଧ୍ୟ ୩ ମାସର ସର୍ବୋଚ୍ଚ ସ୍ତରରେ ପହଞ୍ଚତ୍ଛି। ତେବେ ଭାରତରେ ବଢ଼ିଥିବା ସନ୍ଫ୍ଲାୱର ତେଲ ଦର ବର୍ତ୍ତମାନ ବି ୨୮% ତଳେ ରହିଥିବାବେଳେ ସୋରିଷ ଦର ଅନ୍ତର୍ଜାତୀୟ ବଜାରରେ ୫ ମାସର ସର୍ବୋଚ୍ଚସ୍ତରରେ ରହିଛି। ଏହା ସତ୍ତ୍ୱେ ବି ମୂଲ୍ୟ ବୃଦ୍ଧି ସମୟର ଦର ତୁଳନାରେ ଦାମ ବର୍ତ୍ତମାନ ବି ୧୫% କମ୍ ରହିଛି। ବିଶେଷକରି ଅନ୍ତର୍ଜାତୀୟ ବଜାରରେ ସୋୟାବିନ୍ର ମୂଲ୍ୟ ମଧ୍ୟ ୩ମାସର ସର୍ବୋଚ୍ଚସ୍ତରକୁ ଛୁଇଁଛି। ଫଳରେ ଆମେରିକା ବଜାରରେ ସୋୟାବିନ୍ ବୁସେଲ ପିଛା ଦର ୧୫୦୦ଡଲାର ପାର ହୋଇଯାଇଛି। ଏପରିକି ଦେଶରେ ଉତ୍ପାଦନ ହ୍ରାସ ଆଶଙ୍କା ସହ ଆମେରିକା ବଜାରରେ ସୋୟାବିନ୍ ଦର ମଧ୍ୟ ବଢ଼ିଛି। ଏହି ପରିପ୍ରେକ୍ଷୀରେ ଚାଇନାର ଚାହିଦା ବୃଦ୍ଧି ସୋୟାବିନ୍ ମୂଲ୍ୟ ବୃଦ୍ଧିକୁ ସୁହାଇଛି। ସେହିପରି କୃଷ୍ଣସାଗର ଶସ୍ୟ ରାଜିନାମାରୁ ରୁଷିଆ ନିଜକୁ ପୃଥକ୍ କରିଛି। ତେଣୁ ତୈଳ ଦର ବଢ଼ିବା ଏକ ପ୍ରକାର ନିଶ୍ଚିତ ହୋଇଯାଇଛି। ଏପରିକି ସନ୍ଫ୍ଲାୱାର ତେଲ ଦର ଆହୁରି ବଢ଼ିବ ବୋଲି ଆକଳନ କରାଯାଉଛି।