ଇସଲାମାବାଦ,୧୦।୨ : ଲାହୋର ହାଇକୋର୍ଟରେ ପୂର୍ବତନ ପ୍ରଧାନମନ୍ତ୍ରୀ ନୱାଜ ସରିଫ ଏବଂ ତାଙ୍କ ଝିଅ ମରିୟମ ନୱାଜଙ୍କ ବିଜୟ ଫଳାଫଳକୁ ଚ୍ୟାଲେଞ୍ଜ କରି ଏକ ଆବେଦନ କରାଯାଇଛି। ଶନିବାର କୋର୍ଟରେ ଦିଆଯାଇଥିବା ଆବେଦନରେ କୁହାଯାଇଛି ନିର୍ବାଚନ ଆୟୋଗ ନିର୍ଦ୍ଧାରିତ ପ୍ରକ୍ରିୟାକୁ ବିରୋଧ କରି ପିଏମଏଲଏନ ନେତା ନୱାଜ ସରିଫ ଏବଂ ମରିୟମ ନୱାଜଙ୍କୁ ଲାହୋରର ଜାତୀୟ ବିଧାନସଭା ଆସନରେ ବିଜେତା ଘୋଷଣା କରିଛନ୍ତି।
ପିଟିଆଇ ସମର୍ଥିତ ପ୍ରାର୍ଥୀମାନେ ଦାବି କରିଛନ୍ତି ଫର୍ମ-୪୫ ପରିବର୍ତ୍ତେ ଫର୍ମ-୪୭ ବ୍ୟବହାର କରି ପାକିସ୍ତାନର ନିର୍ବାଚନ ଆୟୋଗ ସେମାନଙ୍କୁ ପରାସ୍ତ କରିଛନ୍ତି। ଏଭଳି ପରିସ୍ଥିତିରେ ଉଭୟ ଆସନରେ ନିର୍ବାଚନ ବାତିଲ କରାଯାଉ। ଫର୍ମ ୪୫, ଗଣନା ଫଳାଫଳ ଫର୍ମ ଭାବରେ ମଧ୍ୟ ଜଣାଶୁଣା। ଏହା ପାକିସ୍ତାନୀ ନିର୍ବାଚନ ପ୍ରକ୍ରିୟାରେ ଏକ ଗୁରୁତ୍ୱପୂର୍ଣ୍ଣ ରେକର୍ଡ । ଏହି ଫର୍ମରେ ମତଦାନ କେନ୍ଦ୍ରରୁ ଫଳାଫଳ ପ୍ରକାଶ ପାଇଥାଏ। ଏହାର ଉଦ୍ଦେଶ୍ୟ ହେଉଛି ଭୋଟ ପ୍ରକ୍ରିୟାର ଫଳାଫଳକୁ ଡକ୍ୟୁମେଣ୍ଟ କରିବା ଏବଂ ମତଦାନ କେନ୍ଦ୍ରରେ ଉତ୍ତରଦାୟିତ୍ୱ ବଜାୟ ରଖିବା।