ମହାକାଳପଡ଼ା,୨ା୬(ଡି.ଏନ୍.ଏ.): ମୌସୁମୀ ବାୟୁ ଚଳିତ ମାସ ଦ୍ୱିତୀୟ ସପ୍ତାହରେ ଓଡ଼ିଶାରେ ପ୍ରବେଶ କରିବ ବୋଲି ଭାରତୀୟ ପାଣିପାଗ ବିଭାଗ ପୂର୍ବାନୁମାନ କରିଛି । ଏହି ପରିପ୍ରେକ୍ଷୀରେ ଚାଷୀମାନେ ଜମିରେ ବିହନ ବୁଣିବା ଆରମ୍ଭ କରିଛନ୍ତି । ପୂର୍ବରୁ ଚାଷୀମାନେ ନିଜ ଉତ୍ପାଦିତ ଦେଶୀ ବିହନକୁ ଅମଳ ବେଳେ ଓଳିଆରେ ବାନ୍ଧି ସାଇତି ରଖୁଥିଲେ । କିନ୍ତୁ ଏବେ ଚାଷୀଙ୍କ ଓଳିଆରୁ ଦେଶୀ ବିହନ ଉଭାନ ହୋଇଛି । ଚାଷୀମାନେ ହାଇବ୍ରିଡ ବା ଶଙ୍କର ଜାତୀୟ ଧାନ ବିହନ ଉପରେ ନିର୍ଭର କରୁଛନ୍ତି । ଏହି ବିହନ ଚାଷ କଲେ ଚାଷୀମାନେ ଅଧିକ ଫସଲ ଅମଳ କରୁଛନ୍ତି । କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଅଞ୍ଚଳରେ ହାଟ ବଜାରରେ ଶଙ୍କର ଜାତୀୟ ଧାନ ବିହନ ପ୍ୟାକେଟ ବିକ୍ରି ହେଉଥିବା ଦେଖିବାକୁ ମିଳିଛି । ଏହି ବିହନ କିଲୋ ପ୍ରତି ୧ଶହରୁ ଅଧିକ ଟଙ୍କାରେ ବିକ୍ରୟ ହେଉଛି । ବିଶେଷ କରି ଶଙ୍କର ଜାତୀୟ ଧାନ ବିହନ ମଧ୍ୟରେ ସ୍ବର୍ଣ୍ଣ , କନକ ପ୍ଲସ , ମାଳି ଫୋର , ପୂଜା , ଶାରଳା , ସାଧନା , ବସୁମତୀ , ହଳଦୀ ଗୁଣ୍ଡି , ଗଙ୍ଗା , ରାଣୀ, କଳାଚମ୍ପା(ଗୋଲ୍ଡ ), ବିନ୍ଦୁ , ବିନା ସୁପର, ବିଧାନ ଆଦି ବିହନକୁ ଚାଷୀମାନେ ଚଢ଼ା ଦରରେ ଖୋଲା ବଜାରରୁ କିଣୁଛନ୍ତି । ହେଲେ ସରକାରୀ ବିହନ ମିଳୁନାହିଁ ।
ସୂଚନା ଅନୁଯାୟୀ, ଏହି ବ୍ଲକରେ ୨୮ ହଜାର ହେକ୍ଟର ଚାଷ ଜମି ରହିଛି । ସେଥିମଧ୍ୟରୁ ୨୪, ୫୦୦ ହେକ୍ଟର ଜମିରେ ଧାନ ଫସଲ ହେଉଛି । ଅବଶିଷ୍ଟ ୮୧୬୩ ହେକ୍ଟର ଜଳ ସେଚନ ଜମି ରହିଛି । ବାକି ୪ ହଜାର ହେକ୍ଟର ଜମିରେ ଅଣ ଧାନ ଫସଲ ହେଉଛି । ଅଣଧାନ ମଧ୍ୟରେ ଡାଲି, ମସଲା , ତୈଳବୀଜ, ପନିପରିବା, ନଳିତା, ଆଖୁ ଆଦି ଫସଲ କରାଯାଉଛି ବୋଲି ସହକାରୀ ବ୍ଲକ କୃଷି ଅଧିକାରୀ ପ୍ରଜ୍ଞା ପରମିତା ସୂଚନା ଦେଇଛନ୍ତି । କୃଷକମାନଙ୍କୁ ସବ୍ସିଡ ଋଣ ଜରିଆରେ କୃଷି ଯନ୍ତ୍ରପାତି ବିଭାଗ ପକ୍ଷରୁ ଯୋଗାଇ ଦିଆଯାଉଛି ବୋଲି ସେ କହିଛନ୍ତି ।