ମୁମ୍ବାଇ,୨୯।୫: ଦେଶରେ ଏବେ କରୋନା ସାମାନ୍ୟ ନିୟନ୍ତ୍ରଣରେ ଥିଲେ ବି ଏହାର ପ୍ରକୋପ କମିନାହିଁ। ଏବେ ବି ଅନେକ ମାମଲା ଚିହ୍ନଟ ହେଉଛନ୍ତି। ଏହାରି ଭିତରେ ମହାରାଷ୍ଟ୍ରରେ ପ୍ରଥମ ଓମିକ୍ରନ୍ର ନୂଆ ସବ ଭାରିଆଣ୍ଟ ଆକ୍ରାନ୍ତ ଚିହ୍ନଟ ହୋଇଛନ୍ତି। ମହାରାଷ୍ଟ୍ର ପୁଣେରୁ ବି.ଏ-୪ର ୪ଟି ମାମଲା ଏବଂ ବି.ଏ-୫ର ୩ଟି ମାମଲା ସାମ୍ନାକୁ ଆସିଛି। ଏ ନେଇ ରାଜ୍ୟ ସ୍ବାସ୍ଥ୍ୟ ବିଭାଗ ପକ୍ଷରୁ ସୂଚନା ଦିଆଯାଇଛି। ଏହି ୭ ଜଣଙ୍କ ମଧ୍ୟରେ ୪ ଜଣ ପୁରୁଷ ଓ ୩ ଜଣ ମହିଳା ଅଛନ୍ତି। ଚାରିଜଣ ଆକ୍ରାନ୍ତ ୫୦ ବର୍ଷରୁ ଅଧିକ ହୋଇଥିବାବେଳେ ଦୁଇଜଣ ଆକ୍ରାନ୍ତ ୨୦ରୁ ୪୦ ବର୍ଷ ଏବଂ ଜଣେ ନଅ ବର୍ଷର ଶିଶୁ ବୋଲି ଜଣାପଡିଛି। ଏହି ସମସ୍ତ ଆକ୍ରାନ୍ତଙ୍କ ମଧ୍ୟରେ ସାମାନ୍ୟ ଲକ୍ଷଣ ଥିବା ବେଳେ ସମସ୍ତେ ଏବେ ଘରେ ରହି ଚିକିତ୍ସିତ ହେଉଛନ୍ତି। ଓମିକ୍ରନ୍ ଆକ୍ରାନ୍ତ ହୋଇଥିବା ମହାରାଷ୍ଟ୍ରର ଦୁଇ ଜଣ ବେଲଜିୟମ ଓ ଦକ୍ଷିଣ ଆଫ୍ରିକା ଏବଂ ଅନ୍ୟ ଦୁଇ ଜଣ କର୍ନାଟକ ଏବଂ କେରଳରୁ ଫେରିଥିଲେ। ସମସ୍ତ ୬ଜଣ ବୟସ୍କ ବ୍ୟକ୍ତି ଟିକାକରଣର ଉଭୟ ଡୋଜ ସମାପ୍ତ କରିଥିବାବେଳେ ସେମାନଙ୍କ ମଧ୍ୟରୁ ଜଣେ ବୁଷ୍ଟର୍ ଡୋଜ୍ ନେଇଛନ୍ତି।