ନୂଆଦିଲ୍ଲୀ,୮।୯: ଜି୨୦ ଶିଖର ସମ୍ମିଳନୀକୁ ନେଇ ଚଳଚଞ୍ଚଳ ହୋଇପଡ଼ିଛି ଦେଶର ରାଜଧାନୀ । ଦିଲ୍ଲୀର କୋଣ ଅନୁକୋଣକୁ ସଜା ଯାଇଥିବା ବେଳେ ସ୍ଥାନେସ୍ଥାନେ ସମ୍ମିଳନୀକୁ ନେଇ ବଡ଼ ପୋଷ୍ଟର ଏବଂ ବ୍ୟାନର ଲଗାଯାଇଛି। ଏସବୁ ମଧ୍ୟରେ ସମ୍ମିଳନୀର ଲୋଗୋ ସମସ୍ତଙ୍କ ଦୃଷ୍ଟି ଆକର୍ଷଣ କରୁଛି। ଆସନ୍ତୁ ଜାଣିବା ଏନେଇ ସବିଶେଷ…
ଜି୨୦ ୨୦୨୩ର ଲୋଗୋ କ’ଣ?
ଧ୍ୟାନର ସହ ଦେଖିଲେ ଏହି ଲୋଗୋରେ ପଦ୍ମ ଫୁଲ ଏବଂ ପୃଥିବୀ ନଜର ଆସୁଛି। ଏହାସହ ସମ୍ପୂର୍ଣ୍ଣ ଲୋଗୋକୁ ତ୍ରିରଙ୍ଗା ରଙ୍ଗ ଦିଆଯାଇଛି। ଲୋଗୋର ନିମ୍ନ ଭାଗରେ ଦେବନାଗରୀ ଲିପିରେ ‘ଭାରତ’ ଲେଖାଯାଇଛି। ଏହି ଲୋଗୋକୁ ଖ୍ୟାତନାମା ବାଲୁକାଶିଳ୍ପୀ ସୁଦର୍ଶନ ପଟ୍ଟନାୟକ ଡିଜାଇନ୍ କରିଛନ୍ତି।
ଜି୨୦ ଲୋଗୋରେ କାହିଁକି ରହିଛି ତ୍ରିରଙ୍ଗାର ରଙ୍ଗ?
ଜି୨୦ ଲୋଗୋରେ ତ୍ରିରଙ୍ଗାର ରଙ୍ଗ ରହିବା ପଛରେ କାରଣଟି ହେଉଛି ଏଥର ସମ୍ମିଳନୀ ଭାରତରେ ହେଉଛି। ଏଣୁ ଏହା ତ୍ରିରଙ୍ଗାରୁ ପ୍ରେରିତ ହୋଇଛି।
ଲୋଗୋରେ ଥିବା ପଦ୍ମ ଏବଂ ପୃଥିବୀର ଅର୍ଥ କ’ଣ?
ଭାରତ ସରକାରଙ୍କ ଜି୨୦ ଓ୍ବେବ୍ସାଇଟ୍ ମୁତାବକ, ଜି୨୦ ଲୋଗୋରେ ଭାରତର ଜାତୀୟ ଫୁଲ ପଦ୍ମକୁ ପୃଥିବୀ ଗ୍ରହ ସହ ପ୍ରସ୍ତୁତ କରାଯାଇଛି। ଏହା ସଂଘର୍ଷ ମଧ୍ୟରେ ବିକାଶକୁ ଦର୍ଶାଉଛି। ଏହାଛଡ଼ା ପୃଥିବୀରେ ଥିବା ଜୀବନ ପ୍ରତି ଭାରତର ପର୍ଯ୍ୟାବରଣ ଅନୁକୂଳ ଦୃଷ୍ଟିକୋଣକୁ ମଧ୍ୟ ଦର୍ଶାଉଛି। ଏହାର ପ୍ରକୃତି ସହ ପୂର୍ଣ୍ଣମାତ୍ରାରେ ସାମଞ୍ଜସ୍ୟ ରହିଛି।
ଜି୨୦ର ଥିମ୍ କ’ଣ?
ଏହି ସମ୍ମିଳନୀର ଥିମ୍ ହେଉଛି ‘ବସୁଧୈବ କୁଟୁମ୍ବକମ୍’ ଅର୍ଥାତ ‘ଗୋଟିଏ ପୃଥିବୀ, ଗୋଟିଏ କୁଟୁମ୍ବ, ଗୋଟିଏ ଭବିଷ୍ୟତ’। ଏହାର ପ୍ରେରଣା ପ୍ରାଚୀନ ସସ୍କୃତ ପାଠରୁ ନିଆଯାଇଛି।
