ନୂଆଦିଲ୍ଲୀ: ୨୦୨୧ ଦ୍ୱିତୀୟାର୍ଦ୍ଧରେ ଦେଶରେ ୫ଜି ସେବା ଉପଲବ୍ଧ ହେବ। ଏ ନେଇ ରିଲାଏନ୍ସ ଇଣ୍ଡଷ୍ଟ୍ରିଜର ଅଧ୍ୟକ୍ଷ ମୁକେଶ ଅମ୍ବାନୀ ମଙ୍ଗଳବାର ଆଭାସ ଦେଇଛନ୍ତି। ଅଲଟ୍ରା ହାଇସ୍ପିଡ୍ ୫ଜି ସେବାକୁ ସାରା ଦେଶରେ ଆରମ୍ଭ କରିବା ଲାଗି ନୀତିଗତ ଭାବେ ପଦକ୍ଷେପ ନେବାର ଆବଶ୍ୟକତା ରହିଛି। ଏହା ହେଲେ ସେବାକୁ ସୁଲଭ ଏବଂ ସବୁ ଆଡେ ଉପଲବ୍ଧ କରାଯାଇପାରିବ। ଏହି ସେବାକୁ ଉପଲବ୍ଧ କରାଇବା ପାଇଁ ବିଦେଶୀ କମ୍ପାନୀଗୁଡିକ ଉପରେ ନିର୍ଭର କରିହେବ ନାହିଁ ବୋଲି ସେ ମତ ରଖିଛନ୍ତି। ଏଥିଲାଗି ଦେଶରେ ହାର୍ଡଓ୍ବେର ମାନୁଫାକଚରିଂ କରିବା ଉପରେ ସେ ଜୋର ଦେଇଛନ୍ତି। ଭର୍ଚୁଆଲ ଭାବେ ସମସ୍ତଙ୍କୁ ସଂଯୋଗ କରିବାରେ ୫ଜି ସହାୟତା କରିବ। ଦେଶରେ ବର୍ତ୍ତମାନ ୩୦ କୋଟି ୨ଜି ଗ୍ରାହକ ରହିଛନ୍ତି। ଏହି ବର୍ଗରେ ଲୋକମାନେ ସୁଲଭ ସ୍ମାର୍ଟଫୋନ ଲାଭ କଲେ ୫ଜି ସେବା ପାଇପାରିବେ। ଏ ନେଇ ନୀତିଗତ ଭାବେ ପଦକ୍ଷେପ ଆସିବା ଆବଶ୍ୟକ ବୋଲି ସେ ମତବ୍ୟକ୍ତ କରିଛନ୍ତି। କରୋନା ଦ୍ୱାରା ପ୍ରଭାବିତ ଅର୍ଥ ବ୍ୟବସ୍ଥା ଆଗାମୀ ଦିନରେ ଦ୍ରୁତ ହାରରେ ଅଭିବୃଦ୍ଧି ହାସଲ କରିବା ନେଇ ସେ ଆଶାବାଦୀ ରହିଥିବା କହିଛନ୍ତି। ଚଳିତ ବର୍ଷ ଅଧିକାଂଶ କାମ ଅନ୍ଲାଇନରେ ହୋଇଥିବାରୁ ଭାରତ ବର୍ତ୍ତମାନ ଅନ୍ଲାଇନ ଆଡକୁ ଦ୍ରୁତ ଭାବେ ଅଗ୍ରସର ହୋଇଛି ବୋଲି ସେ ମତ ରଖିଛନ୍ତି।