ନୂଆଦିଲ୍ଲୀ,୨୧।୭: ଅନ୍ତର୍ଜାତୀୟ ବଜାରରେ ମଙ୍ଗଳବାର ସୁନା ଦର ୯ ବର୍ଷର ରେକର୍ଡ ଉଚ୍ଚ ସ୍ତରରେ ରହିଛି। ନୂଆଦିଲ୍ଲୀରେ ଏହା ମଙ୍ଗଳବାର ୧୯୨ ଟଙ୍କା ବୃଦ୍ଧି ହୋଇଥିବା ଜଣାପଡିଛି। ମଙ୍ଗଳବାର ୧୦ ଗ୍ରାମ ପିଛା ସୁନା ଦର ୫୦,୨୧୪ ଟଙ୍କାରେ ବିକ୍ରି ହେଉଛି। ସୋମବାର ଏହି ଦର ୫୦,୦୨୨ ଟଙ୍କା ରହିଥିବା ଏଚ୍ଡିଏଫ୍ସି ସିକ୍ୟୁରିଟିଜ ପକ୍ଷରୁ ସୂଚନା ରହିଛି। ଅନ୍ତର୍ଜାତୀୟ ବଜାରରେ ସୁନା ସ୍ପଟ୍ ମୂଲ୍ୟ ଆଉନ୍ସ ପ୍ରତି ୧୮୪୧ ଡଲାର ରହିଛି। ଏଥିରେ ୧.୩% ବୃଦ୍ଧି ଘଟିଛି। ଏହି ସମୟରେ ନୂଆଦିଲ୍ଲୀରେ ରୁପା ଦର କିଲୋଗ୍ରାମ ପିଛା ୧୮୩୨ ଟଙ୍କା ବୃଦ୍ଧି ଘଟିଛି। ଫଳରେ ରୁପା ଦର ୫୬,୪୪୧ ଟଙ୍କାକୁ ବୃଦ୍ଧି ଘଟିଛି। ଅନ୍ତର୍ଜାତୀୟ ବଜାରରେ ଆଉନ୍ସ ପ୍ରତି ରୁପା ଦର ୨୧.୪୨ ଡଲାର ରହିଥିବା ସୂଚନା ମିଳିଛି। ମଙ୍ଗଳବାର ୪ ବର୍ଷ ପରେ ରୁପାର ସ୍ପଟ୍ ମୂଲ୍ୟ ଆଉନ୍ସ ପ୍ରତି ୨୦ ଡଲାର ଟପିଯାଇଛି। ଏହା ପୂର୍ବରୁ ୨୦୧୬ ସେପ୍ଟେମ୍ବରରେ ଆଉନ୍ସ ପ୍ରତି ରୁପା ଦର ୨୦ ଡଲାର ଟପିଥିଲା। ସାରା ବିଶ୍ୱରେ ପ୍ରମୁଖ ଅର୍ଥ ବ୍ୟବସ୍ଥାଗୁଡିକ ଷ୍ଟିମୁଲସ ପ୍ୟାକେଜ ନେଇ ପୁଣି ଥରେ ବିଚାର କରୁଥିବାରୁ ଏହାର ପ୍ରଭାବ ସୁନା ବଜାର ଉପରେ ପଡ଼ିଥିବା କୁହାଯାଉଛି।
