ଟେକ୍ନୋଲୋଜି ଆମ ଜୀବନକୁ ଆହୁରି ସହଜ ସରଳ କରିଦେଇଛି। ଯାହାର ଜ୍ୱଳନ୍ତ ଉଦାହରଣ ହେଉଛି ଗୁଗ୍ଲ ମ୍ୟାପ। ଗୁଗ୍ଲ ମ୍ୟାପ୍ ସାହାଯ୍ୟରେ ଆପଣ ଅଜଣା ସ୍ଥାନକୁ ସହଜରେ ଯାଇପାରିବେ ଏବଂ ନିଜର ଗନ୍ତବ୍ୟସ୍ଥଳରେ ପହଞ୍ଚିପାରିବେ। କିନ୍ତୁ ବେଳେବେଳେ ଟେକ୍ନୋଲୋଜି ମଧ୍ୟ ଆପଣଙ୍କୁ ଅଡ଼ୁଆରେ ପକାଇଥାଏ। ଯାହାଦ୍ୱାରା ଅନେକ ସମସ୍ୟାର ସମ୍ମୁଖୀନ ହେବାକୁ ପଡ଼ିଥାଏ। ଏମିତି ଏକ ଘଟଣା ଘଟିଛି ଇଣ୍ଡୋନେସିଆରେ। ଯେଉଁଠି ଗୁଗ୍ଲ ମ୍ୟାପ ଭୁଲ ଯୋଗୁ ଜଣେ ଯୁବକ ବରଯାତ୍ରୀ ସହ ବିବାହ ଦିନ ଭୁଲ ଠିକଣାରେ ଆଉ ଜଣେ କନ୍ୟା ଘରେ ପହଞ୍ଚିଥିଲେ।
କନ୍ୟାଘର ପକ୍ଷ ସେଠାରେ ଅତିଥିମାନଙ୍କୁ ସ୍ବାଗତ କରିଥିଲେ ଏବଂ ଜଳଖିଆ ମଧ୍ୟ ଖାଇବାକୁ ଦେଇଥିଲେ। ପରିବାର ସଦସ୍ୟଙ୍କ ମଧ୍ୟରେ ବାର୍ତ୍ତାଳପରୁ ସୌଭାଗ୍ୟବଶତଃ କନ୍ୟାଙ୍କ ପରିବାର ଲୋକେ କିଛି ଭୁଲ ଅନୁଭବ କଲେ। ଫଳରେ ଏକ ଲଜ୍ଜାଜନକ ପରିସ୍ଥିତି ଉଭୟ ପକ୍ଷଙ୍କୁ ବଞ୍ଚାଇଦେଲା।
ଏକ ରିପୋର୍ଟ ଅନୁଯାୟୀ, ସେହିଦିନ ଦୁଇଟି ବିବାହ ଉତ୍ସବ ଥିଲା। ଗୋଟିଏ ବିବାହ ଏବଂ ଆଉ ଗୋଟିଏ ନିର୍ବନ୍ଧ। ଗୋଟିଏ ଗାଁରେ ଏହି କାର୍ଯ୍ୟକ୍ରମ ହେଉଥିବାରୁ ଦ୍ୱନ୍ଦ୍ୱ ଉପୁଜିଥିଲା। ରିପୋର୍ଟରେ ଦର୍ଶାଯାଇଛି ଯେ, କନ୍ୟା ଆରମ୍ଭରେ ମେକ୍ଅପ ହେବାରେ ବ୍ୟସ୍ତ ଥିବାରୁ ପରିସ୍ଥିତି ବିଷୟରେ ଜାଣିପାରି ନ ଥିଲେ। ବର୍ତ୍ତମାନ ଏହି ଘଟଣାର ଏକ ଭିଡିଓ ଖୁବ୍ ତୀବ୍ର ଗତିରେ ଭାଇରାଲ ହେଉଛି। ଯେଉଁଥିରେ ଏକ ପରିବାର କିଛି ଉପହାର ସହିତ ଅଜବ ସ୍ଥିତିରେ ଯାଉଛନ୍ତି।
ରିପୋର୍ଟ ଅନୁଯାୟୀ, ଜଣେ ଯୁବକ ତାଙ୍କ ବିବାହ ମଣ୍ଡପକୁ ଯିବା ପାଇଁ ଗୁଗ୍ଲ ମ୍ୟାପ୍ ବ୍ୟବହାର କରିଥିଲେ। ଏଥିରେ ଦିଆଯାଇଥିବା ରାସ୍ତା ଅନୁଯାୟୀ ସେ କେନ୍ଦ୍ରୀୟ ଜାଭାର ପାକିସ ଜିଲାର ଲୋସାରି ଗାଁରେ ପହଞ୍ଚିବାର ଥିଲା। କିନ୍ତୁ ଗୁଗ୍ଲ ମ୍ୟାପ୍ରେ ଭୁଲ ହେତୁ ଜେଙ୍ଗକୋଲ ଗାଁରେ ପହଞ୍ଚିଗଲେ। ଯାହାକି ଲୋସାରି ଗାଁଠାରୁ ଅଳ୍ପ ଦୂର ଥିଲା। ସେଠାରେ ମାରିୟା ଉଲ୍ଫା ଏବଂ ତାଙ୍କ ଭାବି ସ୍ବାମୀ ବୁରହାନ ସିଦ୍ଦିକ୍ଙ୍କ ନିର୍ବନ୍ଧ ହେଉଥିଲା। କିନ୍ତୁ ସେହ ସେହି ସ୍ଥାନରେ ପହଞ୍ଚିଥିଲେ ବିବାହ କରିବାକୁ ଯାଇଥିବା ଯୁବକ। ଏଠାରେ ଯେଉଁ ଯୁବତୀଙ୍କ ନିର୍ବନ୍ଧ ହେଉଥିଲା ତାଙ୍କୁ ଦେଖି ସମସ୍ତେ ଆଶ୍ଚର୍ଯ୍ୟ ହୋଇଯାଇଥିଲେ। କାରଣ ସେମାନେ ଯେଉଁଠି ପହଞ୍ଚିଥିଲେ କାହାକୁ ଚିହ୍ନି ନ ଥିଲେ କି ଜାଣି ନ ଥିଲେ। ପରେ ବରଙ୍କ କାକା ଏହା ଜାଣିପାରିଲେ ଯେ, ସେମାନେ କୌଣସି ଏକ ଭୁଲ ଜାଗାରେ ଆସି ପହଞ୍ଚିଯାଇଛନ୍ତି। ପରେ ଏହି ଯୁବକଙ୍କ ଘର ଲୋକଙ୍କ ପକ୍ଷରୁ ନିର୍ବନ୍ଧ ହେଉଥିବା କନ୍ୟାଙ୍କ ପରିବାର ଲୋକଙ୍କୁ ଭୁଲ ମଗାଯାଇଥିଲା। ଉଲ୍ଫାଙ୍କ ପରିବାର ଲୋକଙ୍କ ସହାୟତାରେ ବିବାହ କରିବାକୁ ଯାଇଥିବା ଯୁବକ ଠିକଣା ସ୍ଥାନରେ ଅର୍ଥାତ୍ ତାଙ୍କ କନ୍ୟାଙ୍କ ଘରେ ପହଞ୍ଚିଥିଲେ। ପରେ ବିବାହ ଅନୁଷ୍ଠିତ ହୋଇଥିଲା।
