ମୋରଡ଼ା, ୧୪।୧୦ (ଡି.ଏନ.ଏ.): ମୟୂରଭଞ୍ଜ ଜିଲା ମୋରଡ଼ା ବ୍ଲକ ଅଧୀନ ଗଡ଼ିଗଁା ପଞ୍ଚାୟତ ଲୋଧା କଲୋନୀ ସାହିର ଅଜିତ ମଲିକ ଓ ଦୁର୍ଗୀ ମଲିକଙ୍କ ଝିଅ ସାବି ଚଳିତବର୍ଷ ମାଟ୍ରିକ ପରୀକ୍ଷାରେ ଉତ୍ତୀର୍ଣ୍ଣ ହୋଇଥିଲେ। ଘରର ଆର୍ଥିକ ସ୍ଥିତି ସ୍ବଚ୍ଛଳ ନ ଥିବାବେଳେ ସ୍ଥାୟୀ ବାସିନ୍ଦା ପ୍ରମାଣପତ୍ର ନ ଥିବାରୁ ସାବିଙ୍କ ଉଚ୍ଚଶିକ୍ଷା ଆଶା ମଉଳି ଯାଇଥିଲା। ଏନେଇ ସେପ୍ଟେମ୍ବରରେ ଧରିତ୍ରୀରେ ଖବର ପ୍ରକାଶ ପାଇଥିଲା। ଖବର ପ୍ରକାଶ ପରେ ଯୁବ ସାମାଜିକ କର୍ମୀ ତଥା ଛାତ୍ରନେତା ଅମୀର ଖାନ ଓ ତାଙ୍କ ସହଯୋଗୀମାନେ ସାବିଙ୍କୁ ସହାୟତାର ହାତ ବଢ଼ାଇଛନ୍ତି। ତାଙ୍କ ଘରେ ପହଞ୍ଚି ପ୍ରଥମେ ଖାଦ୍ୟ ଓ ରାଶନ ସାମଗ୍ରୀ ଯୋଗାଇଦେବା ସହ ସାବିଙ୍କୁ ଉଚ୍ଚଶିକ୍ଷା ପାଇଁ ଆଡ଼ମିଶନ କରାଇଦେବେ ବୋଲି ପ୍ରତିଶ୍ରୁତି ମଧ୍ୟ ଦେଇଥିଲେ। ଗୁରୁବାର ଦ୍ୱାଦଶ ଶ୍ରେଣୀରେ ଆଡ଼ମିଶନ ଶେଷ ତାରିଖ ଥିବାବେଳେ ଅମୀର ଓ ତାଙ୍କ ସହଯୋଗୀ ହରେକୃଷ୍ଣ ମହାନ୍ତ ସାବି ଏବଂ ତାଙ୍କ ମା’ଙ୍କୁ ଚିତ୍ରଡ଼ା ମହାବିଦ୍ୟାଳୟକୁ ନେଇଥିଲେ। ସାବିଙ୍କ ଆଡ଼ମିଶନ ପାଇଁ ସମସ୍ତ କାଗଜପତ୍ର ପ୍ରସ୍ତୁତ କରିବା ସହ ୧୫୭୪ ଟଙ୍କା ଜମା କରି ଧନ୍ଦାମୂଳକ ଶିକ୍ଷା(କମ୍ପ୍ୟୁଟର ଟେକ୍ନୋଲୋଜି)ରେ ତାଙ୍କ ନାମ ଲେଖାଇଛନ୍ତି। ଏପରିକି ସାବିଙ୍କ କଲେଜ ଯିବାଆସିବା ପାଇଁ ତାଙ୍କୁ ଏକ ସାଇକେଲ ମଧ୍ୟ ଯୋଗାଇଦେବେ ବୋଲି ଅମୀର ପ୍ରତିଶ୍ରୁତି ଦେଇଛନ୍ତି।
