ସୋର,୨୯ା୧୦(ଡି.ଏନ୍.ଏ.): ଧାନ ଥୋଡ଼ ଆସିବା ବେଳେ ବିଲରେ ପାଣିର ଅଭାବ। ମୌସୁମୀ ବାୟୁ ଫେରି ଯିବା ପରେ ଲଘୁଚାପ ବର୍ଷାକୁ ଭରସା କରିଛନ୍ତି ଚାଷୀ। ବର୍ଷା ନ ହେଲେ ଅମଳ ପ୍ରଭାବିତ ହେବା ଆଶଙ୍କା। ଉଠା ଜଳ ସେଚନ ପ୍ରକଳ୍ପ ପାଣିକୁ ଚାଷୀ ଭରସା କରିଥିବା ବେଳେ ସମ୍ପୃୃକ୍ତ ବିଭାଗରେ ଦେଖାଦେଇଛି କର୍ମଚାରୀ ମରୁଡ଼ି। ଜଣେ ଯନ୍ତ୍ରୀଙ୍କ ଦାୟିତ୍ୱରେ ୧୦୦୦ ପ୍ରକଳ୍ପ। ୯୦ ପ୍ରତିଶତ ପ୍ରକଳ୍ପ ଏବେ ପ୍ରସ୍ତୁତ ଥିବା ବେଳେ ବ୍ୟବହାର ନ କରିବି ବିଦ୍ୟୁତ୍ ଦେୟ ପ୍ରକଳ୍ପ ପିଛା ୫୦ରୁ ୬୦ ହଜାର ଟଙ୍କା ବାକି। ଆବଶ୍ୟକ ବେଳେ ପ୍ରକଳ୍ପରୁ ଜଳ ମିଳିବାର ସମ୍ଭାବନା ଶୂନ। ପ୍ରକଳ୍ପ ସମ୍ପୂର୍ଣ୍ଣ ହେବା ପରେ ପାଣି ପଞ୍ଚାୟତକୁ ହସ୍ତାନ୍ତର କରାଯାଇଛି। କେତେକ ପ୍ରକଳ୍ପ କେବେବି ବ୍ୟବହାର ନ ହୋଇଥିବା ବେଳେ ଚାଷୀଙ୍କ ମୁଣ୍ଡରେ ୩ ଫେଜ୍ ବାହାନାରେ ହଜାର ହଜାର ଟଙ୍କାର ବିଦ୍ୟୁତ୍ ଦେୟ ବାକିଥିବା ସୂଚନା ମିଳିଛି। ଦେୟ ପୈଠ ନ କଲେ ବିଦ୍ୟୁତ୍ ଯୋଗାଣ ବନ୍ଦ କରି ଦିଆଯିବ ବୋଲି ତାଗିଦ ଶୁଣିବାକୁ ମିଳୁଛି। ପୂର୍ବରୁ ସୋରରେ ଥିବା ଉଠା ଜଳସେଚନ ବିଭାଗର ଡିଭିଜନ୍ କାର୍ଯ୍ୟାଳୟ ଉଠିଯିବା ପରେ ଏବେ ନାମକୁ ମାତ୍ର ସବ୍ ଡିଭିଜନ୍ ଟିଏ ଅଛି। ଏହି ଉପଖଣ୍ଡ ଦାୟିତ୍ୱରେ ଥିବା ଇଂ.ସୁରେଶ କୁମାର ଦେ ଏବେ ବାଲେଶ୍ୱର ସଦର ଏସ୍ଡିଓ, ଏସ୍ଟିମେଟର, ଏସ୍ସିଙ୍କ ପିଏ ସହ ସୂଚନା ଅଧିକାରୀଙ୍କ ଭଳି ଅତିରିକ୍ତ ଦାୟିତ୍ୱରେ ଅଛନ୍ତି। ତାଙ୍କ ଅଧୀନରେ ବାଲେଶ୍ୱରର ୭୦୦ ଓ ସୋରର ୩ଶହ ପ୍ରକଳ୍ପ ଅଛି। କାର୍ଯ୍ୟାଳୟରେ ୩ ଜଣ କର୍ମଚାରୀ। ସୋର ଉପଖଣ୍ଡ ଅଧୀନରେ ସୋରର ୨ଟି ସହ ଅନନ୍ତପୁର, ଖଇରା, ସିମୁଳିଆ ସେକ୍ସନ ଅଛି। ଯନ୍ତ୍ରୀ, କର୍ମଚାରୀଙ୍କ ଅଭାବରୁ ଖଇରା ସହ ମିଶିଥିବା ସିମୁଳିଆ କାର୍ଯ୍ୟାଳୟରେ ତାଲା ପଡ଼ିଛି। ସୋରର ୨ଟି ସେକ୍ସନକୁ ମିଶାଇ ଗୋଟିଏ କରାଯାଇଛି। ସବୁ ସେକ୍ସନରେ ସିଭିଲ ଯନ୍ତ୍ରୀ ପଦବୀ ଖାଲି। ବାହାନଗା ଉପଖଣ୍ଡ ଯନ୍ତ୍ରୀ ଇଂ. ଗୌରାଙ୍ଗ ଦାସ ଏବେ ବାହାନଗା ଇଲେକ୍ଟ୍ରିକ୍ ଜେଇଙ୍କ ସହ ଗୋପାଳପୁର, ବାଲେଶ୍ୱର ସାରଗାଁ, ଅନନ୍ତପୁର, ଖଇରା, ସିମୁଳିଆ, ସୋର ସିଭିଲ ଜେଇ ଅତିରିକ୍ତ ଦାୟିତ୍ୱ ବହନ କରୁଛନ୍ତି। ଏଥର ବିଳମ୍ବରେ ମୌସୁମୀ ଆସିଥିଲେ ହେଁ ଚାଷୀ ଧାର କରଜ କରି ଚାଷ କରିଥିଲେ। ଭଲ ଅମଳର ଆଶା ବି ରଖିଥିଲେ। ହେଲେ ଏବେ ଠିକ୍ ଧାନ ଥୋଡ଼ ବେଳେ କାଁଭାଁ କିଛି ତଳିଆ ଅଞ୍ଚଳ ବ୍ୟତୀତ ବିଲ ଶୁଖିଲା ପଡ଼ିଛି। ସପ୍ତାହକ ମଧ୍ୟରେ ବର୍ଷା ନ ହେଲେ ଚାଷ କ୍ଷତିଗ୍ରସ୍ତ ହେବା ନିଶ୍ଚିତ। ଚାଷୀ ଓ ଚାଷର ଉନ୍ନତି ପାଇଁ ସରକାର ତୁରନ୍ତ ପଦକ୍ଷେପ ଗ୍ରହଣ କରିବାକୁ ଚାଷୀମାନେ ଦାବି କରିଛନ୍ତି।