ନୂଆଦିଲ୍ଲୀ, ୧୬।୬: ମୁଁ ଅସୁସ୍ଥ ଥିଲା ବେଳେ ମୋ ପଛରେ ଷଡ଼ଯନ୍ତ୍ର ଚାଲିଥିଲା। ଦଳରେ ଫାଟ ସୃଷ୍ଟି ହେବା ପରେ ପ୍ରଥମ ଥର ପାଇଁ ବୁଧବାର ଗଣମାଧ୍ୟମ ଆଗରେ ଏଭଳି ଦାବି କରିଛନ୍ତି ଲୋକ ଜନଶକ୍ତି ପାର୍ଟି(ଏଲ୍ଜେପି)ର ନେତା ଚିରାଗ ପାଶ୍ୱାନ।
ବିହାର ବିଧାନ ସଭା ନିର୍ବାଚନ ପରେ ଓ ପୂର୍ବରୁ ଜନତା ଦଳ ୟୁନାଇଟେଡ୍(ଜେଡିୟୁ)ର କିଛି ନେତା ଦଳ ଭାଙ୍ଗିବାକୁ ଚାହୁଁ ଥିଲେ। ଏହି ଷଡ଼ଯନ୍ତ୍ରରେ ମୋ ଦଳର କିଛି ନେତା ମଧ୍ୟ ସାମିଲ ଥିଲେ। ଏହି ସମ୍ପର୍କରେ ଆଇସିୟୁରେ ଥିଲା ବେଳେ ମୋ ବାପା ଜଣାଇଥିଲେ। ଏଥିଲାଗି ସେ ଦାଦାଙ୍କ ସହ ମଧ୍ୟ କଥା ହୋଇଥିଲେ ବୋଲି ଚିରାଗ ଗଣମାଧ୍ୟକୁ କହିଛନ୍ତି। ଏହାଦ୍ୱାରା ଦଳରେ ଫାଟ ପାଇଁ ସେ ସିଧାସଳଖ ମୁଖ୍ୟ ମନ୍ତ୍ରୀ ନୀତିଶ କୁମାରଙ୍କ ଦଳକୁ ଟାଗେର୍ଟ କରିଛନ୍ତି।
ଦାଦା ପଶୁପତି କୁମାର ପରାସଙ୍କ ନେତୃତ୍ୱରେ ଗୋଟିଏ ଗୋଷ୍ଠୀ ନେଇଥିବା ନିଷ୍ପତ୍ତିକୁ ଚିରାଗ ପ୍ରତ୍ୟାଖ୍ୟାନ କରି କହିଛନ୍ତି, ମୁଁ ସିଂହର ପୁଅ ବାପା ରାମବିଳାସ ପାଶ୍ୱାନଙ୍କ ଦ୍ୱାରା ପ୍ରତିଷ୍ଠିତ ଦଳ ପାଇଁ ଲଢ଼େଇ ଜାରି ରହିବ।