ଭୁବନେଶ୍ୱର,୧।୧୨: ସ୍ଥାନୀୟ କଳିଙ୍ଗ ଷ୍ଟାଡିୟମରେ ଚାଲିଥିବା ଜୁନିୟର ପୁରୁଷ ହକି ବିଶ୍ୱକପ୍ର ସେମିଫାଇନାଲରେ ପ୍ରବେଶ କରିଛି ଭାରତୀୟ ଦଳ। ଡିଫେଣ୍ଡିଂ ଚାମ୍ପିୟନ ବୁଧବାର ସନ୍ଧ୍ୟାରେ ଆୟୋଜିତ କ୍ୱାର୍ଟର ଫାଇନାଲରେ ବେଲଜିୟମକୁ ୧-୦ ଗୋଲରେ ହରାଇ ଦେଇଛି। ମ୍ୟାଚ୍ରେ ଭାରତ ପାଇଁ ଏକମାତ୍ର ଗୋଲ ସ୍କୋର କରିଥିଲେ ସର୍ଦ୍ଦାନନ୍ଦ ତିୱାରୀ (୨୧ତମ ମିନିଟ୍)। ଏହି ବିଜୟ ସହ ଜୁନିୟର ପୁରୁଷ ହକି ବିଶ୍ୱକପ୍ ଇତିହାସରେ ବେଲଜିୟମ ବିପକ୍ଷରେ ଭାରତ ତା’ର ଅପରାଜେୟ ଧାରା ଜାରି ରଖିଛି। ଇଭେଣ୍ଟ ଇତିହାସରେ ବେଲଜିୟମ ବିପକ୍ଷରେ ଏହା ଭାରତର କ୍ରମାଗତ ୫ମ ବିଜୟ। ଏଥିପୂର୍ବରୁ ଦୁଇ ଦଳ ଗତ ସଂସ୍କରଣର ଫାଇନାଲରେ ପରସ୍ପରକୁ ଭେଟିଥିଲେ। ସେଥର ବେଲଜିୟମକୁ ୨-୧ ହରାଇ ବିଶ୍ୱକପ୍ ହାତେଇଥିଲା ଭାରତ। ଡିସେମ୍ବର ୩ରେ ଭାରତ ସେମିଫାଇନାଲରେ ଟୁର୍ନାମେଣ୍ଟର ସବୁଠାରୁ ସଫଳ ଦଳ ଜର୍ମାନୀକୁ ଭେଟିବ। ଅନ୍ୟ ସେମିଫାଇନାଲରେ ଫ୍ରାନ୍ସ ଓ ଆର୍ଜେଣ୍ଟିନା ମଧ୍ୟରେ ମୁକାବିଲା ହେବ।