ନୂଆଦିଲ୍ଲୀ,୩।୨: ଅଷ୍ଟ୍ରେଲିଆ ଏବଂ କାନାଡାରେ ହୋଇଥିବା ଖଲିସ୍ତାନୀ ହିଂସାକୁ ଭାରତ ଦୃଢ ନିନ୍ଦା କରିଛି। ବୈଦେଶିକ ମନ୍ତ୍ରଣାଳୟର ମୁଖପାତ୍ର ଅରିନ୍ଦମ ବାଗଚି କହିଛନ୍ତି, ଚରମପନ୍ଥୀଙ୍କ ଦ୍ୱାରା ହୋଇଥିବା ଏହି ଆକ୍ରମଣ ତଥା ଘଟଣାକୁ ଆମେ ଦୃଢ ନିନ୍ଦା କରୁଛୁ। ଏହି ଘଟଣାଗୁଡ଼ିକର ଅନୁସନ୍ଧାନ କରାଯାଉ ଏବଂ ଦୋଷୀମାନଙ୍କୁ ଦଣ୍ଡ ଦିଆଯାଉ ବୋଲି ଆମେ ସେଠାକାର ସରକାରଙ୍କୁ ଅନୁରୋଧ କରୁଛୁ। ଆତଙ୍କବାଦୀ ସଂଗଠନର କାର୍ଯ୍ୟକଳାପ ବିଷୟରେ ଅଷ୍ଟ୍ରେଲିଆ ସହିତ ଆଲୋଚନା ହୋଇଛି। ଭାରତୀୟ ସମୁଦାୟର ଲୋକ ଏବଂ ସେମାନଙ୍କ ସମ୍ପତ୍ତି ସୁରକ୍ଷିତ ରହିବା ଉଚିତ୍ ବୋଲି ଆମେ ଅଷ୍ଟ୍ରେଲିଆ ସରକାରଙ୍କୁ ଜଣାଇଛୁ। ଭାରତୀୟ ସ୍ବାର୍ଥ ଏବଂ ସାର୍ବଭୌମତ୍ୱ ବିରୁଦ୍ଧରେ କାର୍ଯ୍ୟକଳାପରେ ଅଷ୍ଟ୍ରେଲୀୟ ମାଟି ବ୍ୟବହାର କରିବାକୁ ଦିଆଯିବ ନାହିଁ।
କାନାଡାରେ ଘଟିଥିବା ହିଂସାତ୍ମକ ଘଟଣା ସମ୍ପର୍କରେ ଅରିନ୍ଦମ ବାଗଚି କହିଛନ୍ତି, କାନାଡାରେ ଘଟିଥିବା ଭଙ୍ଗାରୁଜା ଘଟଣାର ମଧ୍ୟ ନିନ୍ଦା କରୁଛୁ ଏବଂ ସେଠାକାର ସରକାରଙ୍କ ସହ ଏନେଇ ଆଲୋଚନା ମଧ୍ୟ ହୋଇଛି।