ବରଗଡ଼ ଅଫିସ୍,୧୪।୮: ଟୋକିଓ ଅଲିମ୍ପିକ୍ସରେ ବ୍ରୋଞ୍ଜ ପଦକ ସହ ସଫଳତା ହାସଲ କରିଥିବା ଭାରତୀୟ ହକି ଦଳକୁ ୧୬ ତାରିଖରେ ଏକ ସ୍ବତନ୍ତ୍ର ସମାରୋହରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସମ୍ବର୍ଦ୍ଧିତ କରିବେ। ଏହି ସମାରୋହରେ ହକି ଖେଳାଳିଙ୍କୁ ସମ୍ବଲପୁରୀ ବାନ୍ଧକଳାରେ ପ୍ରସ୍ତୁତ ଅଲିମ୍ପିକ୍ସ ହକି ଷ୍ଟୋଲରେ ସମ୍ବର୍ଦ୍ଧନା ଦିଆଯିବ। ଏ ନେଇ ସମ୍ବଲପୁରୀ ବସ୍ତ୍ରାଳୟର ପୂର୍ବତନ ସଭାପତି ସମ୍ବିତ ଆଚାର୍ଯ୍ୟ କହିଛନ୍ତି, ରାଜ୍ୟ ସରକାରଙ୍କ କ୍ରୀଡ଼ା ଓ ଯୁବ ବ୍ୟାପାର ବିଭାଗ ପତ୍ରସଂଖା-୬୭୮୬ ତା-୧୧।୮।୨୦୨୧ରିଖ ଅନୁସାରେ ସମ୍ବଲପୁରୀ ବସ୍ତ୍ରାଳୟ ୬୫ଖଣ୍ଡ ସିଲ୍କ ଏବଂ ୬୪ଖଣ୍ଡ କଟନ୍ ହକି ଷ୍ଟୋଲ ଟୋକିଓ ଅଲିମ୍ପିକ୍ସର ଭାରତୀୟ ହକି ଖେଳାଳିଙ୍କୁ ଯୋଗାଇ ଦେବା ପାଇଁ ପ୍ରତିଶ୍ରୁତି ଦେଇଛି।
ବିଗତ ବର୍ଷର ଡିଜାଇନ ସହିତ ଚଳିତ ବର୍ଷ ହକି ଷ୍ଟିକ୍ ଓ ଅଲିମ୍ପିକ୍ସର ଲୋଗୋକୁ ଉକ୍ତ ଡିଜାଇନରେ ମିଶାଇ ଡିଜାଇନର ମକରଧ୍ୱଜ ମେହେର ଏହାକୁ ନୂତନ ଭାବେ ଡିଜାଇନ କରିଛନ୍ତି। ବରପାଲିର ସନ୍ଥ କବୀର ପୁରସ୍କାର ବିଜେତା ଭିଖାରୀ ମେହେର ସିଲ୍କରେ ବାନ୍ଧ ପ୍ରସ୍ତୁତ କରିଥିବାବେଳେ କେନ୍ଦୁପାଲିର ଗଣେଶ ମେହେର ସହଯୋଗ କରିଛନ୍ତି। ଖୁଣ୍ଟପାଲିର ଗୋପାଳ ମେହେର, ଅଭୟ ମେହେର, ବରପାଲିର ଭିଖାରୀ ମେହେର, ସୋନପୁରର ଶିବଶଙ୍କର ମେହେର ଏହାକୁ ବୁଣିଛନ୍ତି। ସେହିପରି ବାଞ୍ଜିଡୁଙ୍ଗୁରିର ଜିତେନ୍ଦ୍ର ମେହେର, ପଡ଼ା ଗ୍ରାମର ବିରେନ୍ଦ୍ର ମେହେର, ସବିତା ମେହେର, ରଞ୍ଜିତା ମେହେର କଟନ୍ ହକି ଷ୍ଟୋଲ ଡିଜାଇନ୍ର ବାନ୍ଧ ଓ ରଙ୍ଗକାମ ପ୍ରସ୍ତୁତ କରିଛନ୍ତି । ପଡ଼ା ଗ୍ରାମର ଗିରିଧାରୀ ମେହେର, ଗୁଣନିଧି ମେହେର ଏବଂ ବନ୍ଧପାଲି ଗ୍ରାମର ଝସକେତନ ମେହେର ଏହାକୁ ବୁଣିଛନ୍ତି ।