ବମ୍ବେ: ଫିଲ୍ମ ରିଲିଜ ହୋଇନି। ହେଲେ ଏବେଠାରୁ ଡରିଲେଣି ନିର୍ମାତା ତଥା ନିର୍ଦ୍ଦେଶକ କରନ୍ ଜୋହର। କାରଣ ଆଗାମୀ ଦିନରେ ତାଙ୍କ ଫିଲ୍ମ ‘ବ୍ରହ୍ମାସ୍ତ୍ର’ ରିଲିଜ ହେବାକୁ ଯାଉଛି। ଏଭଳି ସ୍ଥିତିରେ ଯଦି ଅକ୍ଷୟ କୁମାର ଏବଂ ଆମିର ଖାଁଙ୍କ ଚଳଚ୍ଚିତ୍ର ପରି ତାଙ୍କ ଫିଲ୍ମର ଅବସ୍ଥା ହୁଏ ତେବେ ଯେ କ’ଣ ହେବ ସେ ଚିନ୍ତାରେ ଏବେ ସେ।
ଚଳିତ ବର୍ଷ ହିନ୍ଦୀ ସିନେମା ଦର୍ଶକଙ୍କ ମନକୁ ଜିଣିଲା ପରି ମନେ ହେଉନାହିଁ। କିଛି ଫିଲ୍ମକୁ ଛାଡ଼ିଦେଲେ ବାକି ଫ୍ଲପ ହେଉଛି। ବିଶେଷକରି ସୋସିଆଲ ମିଡିଆରେ ବଏକଟ୍ ଟ୍ରେଣ୍ଡ କରିବା ଫିଲ୍ମ ବ୍ୟବସାୟକୁ ଠପ୍ କରିଛି। ଏସବୁ ଦେଖି କରନ୍ ନିଜର ଇନ୍ଷ୍ଟାଗ୍ରାମର ଏକ ପୋଷ୍ଟ କରି ନିର୍ଦ୍ଦେଶକ ଅୟାନ ମୁଖାଜୀଙ୍କ ସାହସ ବଢ଼ାଇଛନ୍ତି।
କରନ୍ ଲେଖିଛନ୍ତି, ପ୍ରେମ ଏକ ଅତ୍ୟନ୍ତ ଶକ୍ତିଶାଳୀ ଭାବନା ଏବଂ ଅନୁଭବ ଅଟେ। ଏହାକୁ ବାଣ୍ଟିବା ପରେ ବି ଅନୁଭବ କରିପାରିବେ। ଅୟାନ ମୁଁ ତୁମକୁ ବହୁତ ଭଲ ପାଏ। ତୁମେ ମୋ ପିଲାମାନଙ୍କ ପ୍ରତି ଯେପରି ଅନୁଭବ କରୁଛ, ମୁଁ ତୁମ ପ୍ରତି ସେଭଳି କରୁଛି। ମୁଁ ଜାଣେ ବ୍ରହ୍ମାସ୍ତ୍ରରେ ତୁମେ କେତେ ପରିଶ୍ରମ କରିଛ। ତୁମେ କେତେ ବର୍ଷ ବିତାଇଛ। କାଲି କ’ଣ ହେବ କିମ୍ବା ସେପ୍ଟେମ୍ବର ୯ରେ ବ୍ରହ୍ମାସ୍ତ୍ରର ଭବିଷ୍ୟତ କ’ଣ ହେବ ଜାଣେନା, ହେଲେ ତୁମର ପରିଶ୍ରମ ଏବଂ ତୁମର ଉତ୍ସର୍ଗୀକୃତ ଭାବନା କାରଣରୁ ଆମେ ପୂର୍ବରୁ ଜିତି ସାରିଛେ। କେବଳ ତୁମେ ଉଡିବା ଜାରି ରଖ ଏବଂ ଲକ୍ଷ୍ୟ ଉଚ୍ଚ ରଖ। ତୁମର ସ୍ବପ୍ନ ହେଉଛି ପ୍ରେମ, ଯାହାକୁ ଦୁନିଆ ଶୀଘ୍ର ଦେଖିବ। ଲଭ୍ ୟୁ ମୋ’ ଛୁଆ। ଆଉ ହଁ ଜନ୍ମଦିନର ଶୁଭେଚ୍ଛା। କରନ୍ଙ୍କ ଏହି ପୋଷ୍ଟ ତାଙ୍କ ଡରକୁ ସ୍ପଷ୍ଟ କରିଛି।
କହିରଖୁଛୁ, ୨୦୨୦ରେ ‘ବ୍ରହ୍ମାସ୍ତ୍ର’ ରିଲିଜ ହୋଇଥାନ୍ତା। ହେଲେ କରୋନା ଯୋଗୁ ଏହାର ଶୁଟିଂ ସମ୍ପୂର୍ଣ୍ଣ ହୋଇ ନ ଥିଲା। ଏହାର ଦୁଇ ବର୍ଷ ପରେ ଆସନ୍ତା ମାସରେ ଏହାକୁ ରିଲିଜ କରାଯିବ। ଫିଲ୍ମରେ ରଣବୀର କପୁରଙ୍କ ବ୍ୟତିତ ଆଲିଆ ଭଟ୍ଟ, ଅମିତାଭ ବଚ୍ଚନ, ନାଗାର୍ଜୁନ ଏବଂ ମୌନି ରୟ ପ୍ରମୁଖ ମୁଖ୍ୟ ଭୂମିକାରେ ଅଛନ୍ତି।