ବମ୍ବେ: ‘କୌନ ବନେଗା କରୋଡପତି’ ଦେଶର ସବୁଠାରୁ ବଡ ରିଆଲିଟି ଶୋ’। ଏଥିରେ ଭାଗନେଇ ଅନେକ ରାତାରାତି କୋଟିପତି ହୋଇଛନ୍ତି। ୨୦୦୦ ମସିହାରେ ପ୍ରଥମ ଥର ପାଇଁ ଏହି ଶୋ’ ଆରମ୍ଭ ହୋଇଥିଲା। ପ୍ରଥମ ସିଜିନ୍ରେ ମୁମ୍ବାଇର ହର୍ଷବର୍ଦ୍ଧନ ନଓ୍ବାଠେ ଏକ କୋଟି ଟଙ୍କା ଜିତିଥିଲେ। ଏବେ ହର୍ଷବର୍ଦ୍ଧନ ବୃଦ୍ଧ ହୋଇଗଲେଣି।
୨୦୨୦ରେ ତାଙ୍କର ଏକ ସାକ୍ଷାତକାର ଆସିଥିଲା। ଏଥିରେ ସେ ନିଜର କୋଟିପତି ହେବା ପରର ଯାତ୍ରା ବିଷୟରେ ଅନେକ କିଛି କହିଥିଲେ। କୋଟିଏ ଟଙ୍କା ଜିତିବା ପରେ ହର୍ଷବର୍ଦ୍ଧନଙ୍କ ଫଟୋ ପେଜ୍-୩ରେ ପ୍ରକାଶ ପାଇଥିଲା। ଦିନକୁ ଦିନ ତାଙ୍କର ଲୋକପ୍ରିୟତା ବଢ଼ୁଥିବାରୁ ଲୋକମାନେ ତାଙ୍କ ଝଲକ ପାଇବାକୁ ଏକାଠି ହୋଇଯାଉଥିଲେ।
ଏକଦା ହର୍ଷବର୍ଦ୍ଧନ ଏକ ପ୍ରୋଗ୍ରାମରେ ସାମିଲ ହୋଇଥିଲେ। ସେଠାରେ ବହୁତ ଭିଡ ଥିଲା। ତାଙ୍କ ବଡିଗାର୍ଡମାନେ ଗହଳି ଭିତରେ ହଜି ଯାଇଥିଲେ। ଯେତେ ଚେଷ୍ଟା କଲେ ହେଁ ସେ ତାଙ୍କୁ ପାଇ ନ ଥିଲେ। ଲଗାତାର ଭାବେ ଭିଡ ବଢ଼ୁଥିବା ବେଳେ ସମସ୍ତେ ହାତ ଦେଖାଇ ହର୍ଷବର୍ଦ୍ଧନଙ୍କୁ ଛୁଇଁବାକୁ ଚେଷ୍ଟା କରୁଥିଲେ। କିଛି ସମୟ ପରେ ହଠାତ ହାତରେ କିଛି ଲାଗିଥିବା ସେ ଜାଣିବାକୁ ପାଇଥିଲେ। ପରେ ସେ ଯାହା ଦେଖିଲେ ଚମକି ପଡ଼ିଲେ। କାରଣ ତାଙ୍କ ହାତକୁ ବ୍ଲେଡରେ କେହି କାଟି ଦେଇଥିଲେ। ତାଙ୍କର ରକ୍ତ ବୋହିଚାଲିଥିଲା। ଘଟଣାଟି ଅନେକ ଦିନ ପର୍ଯ୍ୟନ୍ତ ତାଙ୍କୁ କଷ୍ଟ ଦେଇଥିଲା।
ଏହାଛଡ଼ା ହର୍ଷବର୍ଦ୍ଧନ ବାଲ ଠାକ୍ରେଙ୍କୁ ଭେଟିଥିଲେ। ଠାକ୍ରେ ତାଙ୍କୁ ସମ୍ମାନର ସହ ପାଖରେ ବସାଇ ଅନେକ ବିଷୟରେ ପରାମର୍ଶ ଦେଇଥିଲେ। ସେଥିରୁ ଗୋଟିଏ ଥିଲା ହାତ ନ ମିଳାଇ ନମସ୍କାର କରିବା। ଏହାକୁ ସେ ଆଜିଯାଏ ମାନି ଆସୁଛନ୍ତି ବୋଲି ସାକ୍ଷାତକାରରେ କହିଥିଲେ।
