ଅହମଦାବାଦ, ୩।୯ : ଆମ ଆଦମୀ ପାର୍ଟିର ରାଷ୍ଟ୍ରୀୟ ସଂଯୋଜକ ତଥା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲ ଶାସକ ଦଳରେ ରହିଥିବାବେଳେ ଗୁଜରାଟର ଭାରତୀୟ ଜନତା ପାର୍ଟି କର୍ମୀଙ୍କୁ ନିବେଦନ କରିଛନ୍ତି। ଗୁଜରାଟ ଗସ୍ତର ଶେଷ ଦିନ ଶନିବାର ରାଜକୋଟରେ ଏକ ଗଣମାଧ୍ୟମ ସମ୍ମିଳନୀକୁ ସମ୍ବୋଧିତ କରି କେଜରିୱାଲ କହିଛନ୍ତି ଯେ ଭାଜପା କର୍ମୀମାନେ ଦଳରୁ ଦରମା ନେବା ରଖନ୍ତୁ, କିନ୍ତୁ ଭିତରୁ ସେମାନେ ଏଏପି ପାଇଁ କାମ କରନ୍ତୁ। କାରଣ ଆମ ପାଖରେ ଟଙ୍କା ନାହିଁ।
ଯଦି ଏଏପି ରାଜ୍ୟରେ କ୍ଷମତାକୁ ଆସିବ ତେବେ ସାଧାରଣ ଲୋକଙ୍କୁ ଦିଆଯାଇଥିବା ସମସ୍ତ ପ୍ରତିଶ୍ରୁତିର ଲାଭ ଭାଜପା କର୍ମୀମାନେ ମଧ୍ୟ ପାଇବେ। ଆମେ ଭାଜପା ନେତାମାନଙ୍କୁ ଆମ ଦଳରେ ଅନ୍ତର୍ଭୁକ୍ତ କରିବାକୁ ଚାହୁଁନାହୁଁ। ଭାଜପା ଏହାର ନେତାମାନଙ୍କୁ ରଖିପାରିବ।
ଭାଜପାର ଗାଁ, ବୁଥ ଏବଂ ତାଲୁକରେ ଥିବା କର୍ମୀମାନେ ବହୁ ସଂଖ୍ୟାରେ ଆମ ସହ ଯୋଗ ଦେଉଛନ୍ତି। ମୁଁ ତାଙ୍କୁ ପଚାରିବାକୁ ଚାହୁଁଛି ଏତେ ବର୍ଷ ପରେ ମଧ୍ୟ ତାଙ୍କ ସେବା ବଦଳରେ ଭାଜପା ତାଙ୍କୁ କଣ ଦେଇଛି? କେଜରିୱାଲ କହିଛନ୍ତି ଯେ ଭାଜପା ଏହାର ଦଳୀୟ କର୍ମଚାରୀ ଏବଂ ସେମାନଙ୍କ ପରିବାର ସଦସ୍ୟଙ୍କୁ ମାଗଣା ତଥା ଗୁଣାତ୍ମକ ଶିକ୍ଷା, ସ୍ବାସ୍ଥ୍ୟସେବା ଏବଂ ମାଗଣା ବିଦ୍ୟୁତ ଭଳି ସୁବିଧା ପ୍ରଦାନ କରୁନାହିଁ, କିନ୍ତୁ ଆମ ଆଦମୀ ପାର୍ଟି ସେମାନଙ୍କ କଲ୍ୟାଣ ପାଇଁ ଯତ୍ନବାନ ହେବ। ରାଜ୍ୟରେ ଗ୍ରାମାଞ୍ଚଳର ପରିବାରର ମହିଳାମାନଙ୍କୁ ଭତ୍ତା ଭାବରେ ମାସକୁ ହଜାରେ ଟଙ୍କା ମଧ୍ୟ ଏଏପି ସରକାର ଦେବେ। ସେ ଭାଜପା କର୍ମୀଙ୍କୁ ଅପିଲ୍ କରିଛନ୍ତି ୨୭ ବର୍ଷ ଶାସନ ସତ୍ତ୍ୱେ ରାଜ୍ୟରେ ସାଧାରଣ ଜନତାଙ୍କ ସ୍ଥିତିରେ କୌଣସି ପରିବର୍ତ୍ତନ ହୋଇ ନାହିଁ।
କେଜରିୱାଲ ନିକଟରେ ଆମ ଆଦମୀ ପାର୍ଟିର ଗୁଜରାଟ ୟୁନିଟ ସାଧାରଣ ସମ୍ପାଦକ ମନୋଜ ସୋରାଥିଆଙ୍କ ଉପରେ ହୋଇଥିବା ଆକ୍ରମଣ ପ୍ରସଙ୍ଗ ଉଠାଇଥିଲେ। ସେ ଆଶଙ୍କା ପ୍ରକଟ କରିଥିଲେ ଯେ ଏଏପିକୁ ସମର୍ଥନ କଲେ ଗୁଜରାଟବାସୀଙ୍କ ଉପରେ ଆହୁରି ଅନେକ ଆକ୍ରମଣ ହେବ। ମନୋଜ ସୋରାଥିଆଙ୍କ ଉପରେ ହୋଇଥିବା ଆକ୍ରମଣରୁ ଜଣାପଡିଛି ଯେ ଭାଜପା ନିରାଶ ହେବାରେ ଲାଗିଛି। କ’ଣ କରିବାକୁ ହେବ ବୁଝି ପାରୁନାହାଁନ୍ତି। ଭାଜପାକୁ ପରାଜୟ ଦେଖାଯିବା ଆରମ୍ଭ କରିଛି। ଆମ ଆଦମୀ ପାର୍ଟି କଂଗ୍ରେସ ନୁହେଁ । ଏଏପିକୁ ଶାସକ ଦଳ ଭୟଭୀତ କରିପାରିବ ନାହିଁ ବୋଲି କେଜରିଓ୍ବାଲ ଦୃଢ଼ୋକ୍ତି ପ୍ରକାଶ କରିଛନ୍ତି।