ପଲମ, ୧୭।୧୨ (ଡି.ଏନ୍.ଏ)-କଳାହାଣ୍ଡି ଜିଲ୍ଲା କର୍ଲାମୁଣ୍ଡା ବ୍ଲକ ଯୋରାଡବରା ପଞ୍ଚାୟତ ସ୍ଥିତ କୁସୁର୍ଲା ନିଳକଣ୍ଠେଶ୍ୱର ମନ୍ଦିର ପରିସରରେ ୪୫ ଖଣ୍ଡ ଗ୍ରାମର ସଭ୍ୟମାନଙ୍କୁ ନେଇ ବୁଧବାର ବୈଠକ ଅନୁଷ୍ଠିତ ହୋଇଥିଲା। ଆସନ୍ତା ଜାନୁଆରି ୧୪ ତାରିଖରେ ନିଳକଣ୍ଠେଶ୍ୱର ମନ୍ଦିରରେ ସ୍ବତନ୍ତ୍ର ପୂଜା ଓ ମକରମେଳା ନେଇ ଆଲୋଚନା ହୋଇଥିଲା । କରୋନା ମହାମାରୀକୁ ଦୃଷ୍ଟିରେ ରଖି ଓ ସରକାରଙ୍କ କୋଭିଡ଼ ଗାଇଡ଼ ଲାଇନକୁ ମାନିବାକୁ ଯାଇ ମେଳାକୁ ବାତିଲ କରାଯିବ ବୋଲି ବୈଠକରେ ନିଷ୍ପତ୍ତି ହୋଇଥିଲା । ତେଣୁ ମେଳାକୁ ଆସୁଥିବା ବ୍ୟବସାୟୀ ଓ ସାଧାରଣ ଲୋକଙ୍କୁ ନ ଆସିବାକୁ ଅନୁରୋଧ କରାଯାଇଛି। ମେଳା ସହିତ ସମସ୍ତ ସାଂସ୍କୃତିକ କାର୍ଯ୍ୟକ୍ରମ ବାତିଲ କରାଯାଇଛି । କେବଳ ବିଧି ରକ୍ଷା କରି ମନ୍ଦିରରେ ହାତଗଣତି ଲୋକଙ୍କୁ ନେଇ ପୂଜାର୍ଚ୍ଚନା କରାଯିବ। ଏହି ବୈଠକରେ ନିଳକଣ୍ଠେଶ୍ୱର ମନ୍ଦିର ପରିଚାଳନା କମିଟିରେ ସଭ୍ୟ ଥିବା ୪୫ଖଣ୍ଡ ଗ୍ରାମର ସଭ୍ୟ ଯୋଗଦାନ କରିଥିଲେ । ସ୍ଥାୟୀ ସଭାପତି ଜଗତରାମ ଭୋଇ ବୈଠକରେ ସଭାପତିତ୍ୱ କରିଥିଲେ। ସ୍ଥାୟୀ ସମ୍ପାଦକ କଂସାସୁର ଜାନୀ ଉପସ୍ଥିତ ରହି ସଭା କାର୍ଯ୍ୟ ଆରମ୍ଭ କରିଥିଲେ। ସଭାପତି ଜଗତରାମ ଭୋଇ କହିଥିଲେ ଯେ, ପ୍ରତିବର୍ଷ ଜାକଜମକରେ ପାଳିତ ହୋଇଆସୁଥିବା ଅଞ୍ଚଳର ପ୍ରସିଦ୍ଧ କୁସୁର୍ଲା ମକର ମେଳା ବାତିଲ କରାଗଲା । ସରକାରଙ୍କ କୋଭିଡ଼ ୧୯ ଗାଇଡ଼ ଲାଇନକୁ ପାଳନ କରି ମନ୍ଦିର ଭିତରେ ପୂଜା କରାଯିବ । ସମ୍ପାଦକ କଂସାସୁର ଜାନୀ କହିଥିଲେ, ଯାତ୍ରା ହେବ ନାହିଁ କି ରଥ ମଧ୍ୟ ବୁଲିବ ନାହିଁ। ମନ୍ଦିର ପୂଜକ ନେତ୍ରାନନ୍ଦ ବଡ଼ମାଳି କହିଥିଲେ, ସରକାରଙ୍କ ନିୟମକୁ ପାଳନ କରାଯାଇ ସାମାଜିକ ଦୂରତା ରକ୍ଷା କରି ମନ୍ଦିର ଭିତରେ ପୂଜା କରାଯିବ।
