ପାଟନା,୧୨।୧୧: ବିହାରରେ ମହାମେଣ୍ଟ ସରକାର ଗଠନ ହେବ। ଏନେଇ ଆର୍ଜେଡ଼ି ପକ୍ଷରୁ ତେଜସ୍ବୀ ଯାଦବ ଗୁରୁବାର ମହାମେଣ୍ଟର ନବ ନିର୍ବାଚିତ ବିଧାୟକଙ୍କ ବୈଠକରେ କହିଛନ୍ତି। ପୂର୍ବତନ ମୁଖ୍ୟମନ୍ତ୍ରୀ ରାବ୍ରି ଦେବୀଙ୍କ ବାସଭବନରେ ଆୟୋଜିତ ବୈଠକରେ ମେଣ୍ଟର ନେତା ଭାବେ ତେଜସ୍ବୀ ଯାଦବଙ୍କୁ ନିର୍ବାଚିତ କରାଯାଇଛି। ମହାମେଣ୍ଟ କିଛି ଅଧିକ ଆସନରେ ବିଜୟୀ ହୋଇଥାନ୍ତା, ମାତ୍ର କଂଗ୍ରେସ ଯୋଗୁ ଏହା ସମ୍ଭବ ହୋଇ ନ ଥିବା ମେଣ୍ଟର କେତେକ ସହଯୋଗୀ ଦଳ ବୈଠକରେ ପ୍ରକାଶ କରିଥିଲେ। କଂଗ୍ରେସ ୭୦ଆସନରେ ଲଢ଼ି ୧୯ରେ ବିଜୟୀ ହୋଇଛି। ଏସବୁ ଆସନ ଯଦି ଆର୍ଜେଡ଼ି ଅବା ମେଣ୍ଟର ଅନ୍ୟ ସହଯୋଗୀଙ୍କୁ ଦିଆଯାଇଥାନ୍ତା ତେବେ ଫଳାଫଳ ଭଲ ହୋଇଥାନ୍ତା ବୋଲି ବୈଠକରେ କିଛି ନେତା ମତପୋଷଣ କରିଛନ୍ତି। ମହାମେଣ୍ଟର ସମସ୍ତ ବିଧାୟକଙ୍କୁ ମାସେ ବ୍ୟାପି ପାଟନାରେ ରହିବାକୁ ବୈଠକରେ ତେଜସ୍ବୀ ପରାମର୍ଶ ଦେଇଛନ୍ତି। ଏବେ ସରକାର ଗଠନ ପାଇଁ ତେଜସ୍ବୀ ଦେଇଥିବା ମନ୍ତବ୍ୟକୁ ନେଇ ଚର୍ଚ୍ଚା ଆରମ୍ଭ ହୋଇଛି।