କୋଲକାତା,୨୯।୧୧ : ମଙ୍ଗଳବାର ଉତ୍ତର ୨୪ ପରଗଣାର ହିଙ୍ଗାଲଗଞ୍ଜ ଠାରେ ଏକ ସଭାରେ ପଶ୍ଚିମବଙ୍ଗର ମୁଖ୍ୟମନ୍ତ୍ରୀ ମମତା ବାନାର୍ଜୀ କ୍ରୋଧିତ ହୋଇ ସସରକାରୀ ବାବୁଙ୍କ ଉପରେ ବର୍ଷିଥିଲେ। କ୍ରୋଧିତ ମୁଖ୍ୟମନ୍ତ୍ରୀ ମମତା ବାନାର୍ଜୀ ଏହି କାର୍ଯ୍ୟକ୍ରମକୁ ମଧ୍ୟଭାଗରେ ବନ୍ଦ କରି ପ୍ରାୟ ୧୫ ମିନିଟ ଚୁପ୍ଚାପ ବସିଥିଲେ। ସେ ଜନସାଧାରଣଙ୍କ ଆଡକୁ ହାତ ବୁଲାଇ ଇଶାରା କରି କହିଥିଲେ ଯେ, ବସିଯାଅ, ମୁଁ ମଧ୍ୟ ବସୁଛି।
ସୂଚନା ଅନୁଯାୟୀ, ଦେବୀ ପୂଜା ଅବସରରେ ସେ ସାଧାରଣ ଲୋକଙ୍କୁ ୧୫ ହଜାର ଶୀତ ବସ୍ତ୍ର ଦେବାକୁ ଘୋଷଣା କରିଥିଲେ। କିନ୍ତୁ ପୋଷାକ ମଞ୍ଚରେ ଉପସ୍ଥିତ ନଥିଲା, ଯାହା ତାଙ୍କୁ କ୍ରୋଧିତ କରିଥିଲା । ପୋଷାକ ନ ଆସିବା ପର୍ଯ୍ୟନ୍ତ ସେ ତାଙ୍କର ସଭା ଆରମ୍ଭ କରିବେ ନାହିଁ ବୋଲି କହିଥିଲେ।
କ୍ରୋଧିତ ମୁଖ୍ୟମନ୍ତ୍ରୀ ଶୀତଦିନିଆ ପୋଷାକ ନ ପାଇ ବିଡ଼ଓ ଏବଂ ଡିଏମଙ୍କୁ ତାଗିଦ କରିଥିଲେ । ସେ କହିଛନ୍ତି, ମୁଁ ଯେଉଁ କାମ ପାଇଁ ଆସିଛି, ତାହା କରିପାରୁ ନାହିଁ। ତେଣୁ ଭାଷଣ ଦେବାର କୌଣସି ଅର୍ଥ ନାହିଁ। ବିଡ଼ଓ ଏବଂ ଡିଏମ ଅବହେଳା କରୁଛନ୍ତି। ସେଥିପାଇଁ ମୋତେ କ୍ଷମା ମାଗିବାକୁ ପଡୁଛି। ବିଡ଼ଓ ଏବଂ ଡିଏମଙ୍କୁ ଭର୍ତ୍ସନା କରି କହିଥିଲେ, ଯଦି ତୁମେ ସଠିକ ଭାବରେ କାମ କରିପାରିବ ନାହିଁ, ତେବେ ଚାକିରି ଛାଡିଦିଅ ।
ମୁଖ୍ୟମନ୍ତ୍ରୀ ପ୍ରାୟ ୧୫ ମିନିଟ ମଞ୍ଚରେ ଚୁପ୍ଚାପ ବସିଥିଲେ। ଏହା ପରେ କମ୍ବଳ ଅଣାଯାଇଥିଲା। ପ୍ରାୟ ୧୦୦୦ କମ୍ବଳ ବଣ୍ଟନ କରାଯାଇଥିଲା। ସେ କହିଥିଲେ, ଲୋକଙ୍କ ପାଇଁ ଉପହାର ଆଣିଥିଲି, ଯଦି ତାହା ନ ମିଳିବ ତେବେ ମୁଁ କ୍ରୋଧିତ ହେବା ସ୍ବାଭାବିକ।
