କେନ୍ଦୁଝର, ୧୨।୬(ଡି.ଏନ୍.ଏ.) ଓଏମ୍ବିଏଡିସି (ଓଡ଼ିଶା ମିନେରାଲ ବିୟରିଂ ଏରିଆସ୍ ଡେଭଲପମେଣ୍ଟ କର୍ପୋରେଶନ) ସିଇଓ ଜି. ରାଜେଶ ଦୁଇଦିନିଆ କେନ୍ଦୁଝର ଗସ୍ତରେ ଆସି ଶୁକ୍ରବାର ଜିଲା ମୁଖ୍ୟ କୃଷି ଅଧିକାରୀଙ୍କ କାର୍ଯ୍ୟାଳୟ ପରିସରରେ ବାୟୁ ପ୍ରଦୂଷଣ ଯାଞ୍ଚ କରିବାକୁ ଲାଗିଥିବା ସିଏଏକ୍ୟୁଏମ୍ଏସ୍ ପରିଦର୍ଶନ କରିଥିଲେ। ରାସ୍ତାରେ ଯାଉଥିବା ଲୋକଙ୍କୁ ଏହାର ଡିସପ୍ଲେ ବୋର୍ଡ ଦୃଶ୍ୟମାନ ହେଉ ନ ଥିବାରୁ ଡିସପ୍ଲେ ବୋର୍ଡ ଉଚ୍ଚତା ବଢାଇବାକୁ କହିଥିଲେ। ଏହାପରେ ସେ ଜିଲା ମୁଖ୍ୟ ଚିକିତ୍ସାଳୟରେ ହୋଇଥିବା ଶତବାର୍ଷିକୀ କୋଠା ଏବଂ ଷ୍ଟାଫ କ୍ୱାର୍ଟର୍ସ ପରିଦର୍ଶନ କରିଥିଲେ। ବାଂଶପାଳ ବ୍ଲକ ତଳଚମ୍ପେଇ ଠାରେ ହୋଇଥିବା ଓଡ଼ିିଶା ଆଦର୍ଶ ବିଦ୍ୟାଳୟ ପରିଦର୍ଶନ କରିଥିଲେ। ଅନୁସୂଚିତ ଜାତି ଓ ଜନଜାତି ବିଭାଗ ପରିଚାଳିତ ଗୋନାସିକା ହାଇସ୍କୁଲରେ ଓମ୍ବାଡସି ଅର୍ଥରେ ବିଭିନ୍ନ ଉନ୍ନୟନ ମୂଳକ କାର୍ଯ୍ୟ, ଷ୍ଟାଫ କ୍ୱାର୍ଟର୍ସ ଓ ଶ୍ରେଣୀ ଗୃହ ପରିଦର୍ଶନ କରିଥିଲେ। ଶନିବାର ମୃତ୍ତିକା ସଂରକ୍ଷଣ ଏବଂ ଜଳ ବିଭାଜିକା ବିଭାଗ ଦ୍ୱାରା ଯୋଡା ବ୍ଲକର ବିରିକଳା ପଞ୍ଚାୟତର ବଳିତା ଗ୍ରାମରେ ଓମ୍ବାଡସି ଯୋଜନାରେ କରାଯାଇଥିବା ଚେକ୍ଡ୍ୟାମ୍ ମଧ୍ୟ ପରିଦର୍ଶନ କରିଥିଲେ। ଏହି କ୍ରମରେ ଉପସ୍ଥିତ ଥିବା ଚାଷୀମାନଙ୍କୁ ଚେକ୍ଡ୍ୟାମ୍ରେ ଗଚ୍ଛିତ ଥିବା ଜଳକୁ ଉପଯୋଗ କରି ଖରାଟିଆ ଫସଲ ଚାଷ କରିବା ପାଇଁ ପରାମର୍ଶ ଦେଇଥିଲେ। ମୃତ୍ତିକା ସଂରକ୍ଷଣ ଅଧିକାରୀଙ୍କୁ ଏଥିନିମନ୍ତେ ଆବଶ୍ୟକୀୟ ପଦକ୍ଷେପ ଗ୍ରହଣ କରିବା ପାଇଁ ପରାମର୍ଶ ଦେଇଥିଲେ। ଗସ୍ତ ସମୟରେ ଜଳ ବିଭାଜିକା ନିର୍ଦ୍ଦେଶକ ସୁଶାନ୍ତ କୁମାର ମଲ୍ଲିକ, ସହକାରୀ ପ୍ରକଳ୍ପ ନିର୍ଦ୍ଦେଶକ ବନମାଳି ପାତ୍ର ଏବଂ ପ୍ରକଳ୍ପ ସହଯୋଗୀ ପ୍ରଭାତ କୁମାର ସେଠୀ ଉପସ୍ଥିତ ଥିଲେ।