ନୂଆଦିଲ୍ଲୀ,୧୧ା୧(ପି.ଟି.): ଭାରତୀୟ ସେନା ବିରୋଧରେ ଟୁଇଟ୍ କରିଥିବା ଜେଏନ୍ୟୁ ଛାତ୍ର ସଂଗଠନର ପୂର୍ବତନ ଉପ ସଭାନେତ୍ରୀ ଶେହଲା ରଶିଦଙ୍କ ବିରୋଧରେ ତଦନ୍ତ କରି କାର୍ଯ୍ୟାନୁଷ୍ଠାନ ଗ୍ରହଣ ଲାଗି ଦିଲ୍ଲୀ ଉପରାଜ୍ୟପାଳ ଭି.କେ. ସାକ୍ସେନା ମଙ୍ଗଳବାର ମଞ୍ଜୁରୀ ପ୍ରଦାନ କରିଛନ୍ତି। ଆଇନଜୀବୀ ଅଲଖ ଆଲୋକ ଶ୍ରୀବାସ୍ତବଙ୍କ ଅଭିଯୋଗକ୍ରମେ ଦିଲ୍ଲୀ ପୋଲିସର ସ୍ବତନ୍ତ୍ର ସେଲ୍ ୨୦୧୯ରେ ଶେହଲାଙ୍କ ବିରୋଧରେ ଏତଲା ଦାଏର କରିଥିଲା। ସିଆର୍ପିସିର ଧାରା ୧୯୬ରେ ଉପରାଜ୍ୟପାଳ କାର୍ଯ୍ୟାନୁଷ୍ଠାନ ଲାଗି ମଞ୍ଜୁରୀ ଦେଇଛନ୍ତି। ରାଷ୍ଟ୍ର ବିରୋଧୀ ଅପରାଧ ଏବଂ ଆପରାଧିକ ଷଡ଼ଯନ୍ତ୍ର ଘଟଣାରେ ମକଦ୍ଦମା ଲାଗି ଉକ୍ତ ଧାରାରେ ମଞ୍ଜୁରୀର ଆବଶ୍ୟକତା ପଡ଼ିଥାଏ। ଜେଏନ୍ୟୁ ଛାତ୍ର ସଂଗଠନର ପୂର୍ବତନ ଉପ ସଭାନେତ୍ରୀ ବିଭିନ୍ନ ସମ୍ପ୍ରଦାୟ ମଧ୍ୟରେ ଶତ୍ରୁତାକୁ ବଢ଼ାଇବା ସହ ସଦ୍ଭାବନା ପ୍ରତି କ୍ଷତି ପହଞ୍ଚାଉଥିଲେ। ସେନା ଯବାନମାନେ କଶ୍ମୀର ଲୋକଙ୍କ ଘରେ ପଶି ନିର୍ଯାତନା ଦେଉଥିବା ୨୦୧୯ ଅଗଷ୍ଟ ୧୮ରେ ସେ ଟୁଇଟ୍ କରିଥିଲେ। ଏହା ସମ୍ପୂର୍ଣ୍ଣ ଭିତ୍ତିହୀନ କହି ସେନ୍ୟବାହିନୀ ଅଭିଯୋଗକୁ ଖଣ୍ଡନ କରିଥିଲା।