ମସ୍କୋ/କିଭ୍,୩ା୧୨: ଦୀର୍ଘ ୯ ମାସ ଧରି ଚାଲିଥିବା ୟୁକ୍ରେନ୍ ଯୁଦ୍ଧର ଅବସାନ ଘଟିପାରେ। ରୁଷିଆ ରାଷ୍ଟ୍ରପତି ଭ୍ଲାଡିମିର ପୁଟିନ୍ ଏକ ସମ୍ଭାବ୍ୟ ସମାଧାନ ପାଇଁ ଆଲୋଚନା କରିବାକୁ ଶୁକ୍ରବାର ରାଜି ହେବା ପରେ ଏପରି ସଙ୍କେତ ମିଳିଛି। କିନ୍ତୁ ରୁଷିଆ ଦଖଲରେ ଥିବା ୟୁକ୍ରେନୀୟ ଅଞ୍ଚଳକୁ ସ୍ବୀକୃତି ପ୍ରଦାନ ଲାଗି ଓ୍ବାଶିଂଟନର ଅଗ୍ରାହ୍ୟ ଏହି ବୁଝାମଣା ଆଗରେ ଅନ୍ତରାୟ ସାଜିପାରେ ବୋଲି କ୍ରେମ୍ଲିନ ମୁଖପାତ୍ର ଡିମିଟ୍ରି ପେସ୍କୋଭ୍ ଏକ ବିବୃତିରେ କହିଛନ୍ତି।
ରୁଷିଆ ଷ୍ଟ୍ରଙ୍ଗ୍ମ୍ୟାନ୍ ପୁଟିନ୍ ୟୁକ୍ରେନ୍ ପ୍ରସଙ୍ଗରେ ଆଲୋଚନା ନିମନ୍ତେ ଆଗ୍ରହ ପ୍ରକାଶ କରିଛନ୍ତି। କିନ୍ତୁ ପାଶ୍ଚାତ୍ୟ ମସ୍କୋର ଦାବିଗୁଡ଼ିକୁ ଗ୍ରହଣ କରିବା ଜରୁରୀ ବୋଲି ଶୁକ୍ରବାର କ୍ରେମ୍ଲିନ୍ ସର୍ତ୍ତ ବାଢ଼ିଛି। ଏହା ପୂର୍ବରୁ ଆମେରିକା ରାଷ୍ଟ୍ରପତି ଜୋ ବାଇଡେନ୍ ପୁଟିନ୍ଙ୍କ ସହ ଆଲୋଚନା ପାଇଁ ପ୍ରସ୍ତୁତ ଥିବା କହିଥିଲେ। ୟୁକ୍ରେନ୍ରେ ଯୁଦ୍ଧ ଶେଷ କରିବାକୁ ପୁଟିନ୍ ଚାହୁଁଥିଲେ ତାଙ୍କ ସହ କଥା ହେବାରେ କିଛି ଅସୁବିଧା ନାହିଁ। ତେବେ ଏନେଇ କ୍ରେମ୍ଲିନ ମୁଖ୍ୟ କୌଣସି ପ୍ରକାର ସଙ୍କେତ ଦେଇ ନ ଥିବା ବାଇଡେନ୍ କହିଥିଲେ। ବାଇଡେନ୍ ଓ ଫ୍ରାନ୍ସ ରାଷ୍ଟ୍ରପତି ଇମାନ୍ବେଲ୍ ମାକ୍ରଁ ହ୍ବାଇଟ୍ ହାଉସ୍ରେ ଆଲୋଚନା କରିଥିଲେ। ୟୁକ୍ରେନ୍ ଆକ୍ରମଣ ପାଇଁ ରୁଷିଆକୁ ଉତ୍ତରଦାୟୀ କରିବା ଉପରେ ଦୁଇନେତାଙ୍କ ମଧ୍ୟରେ ମନ୍ତ୍ରଣା ହୋଇଥିଲା।
ଗତ ଫେବୃୟାରୀ ୨୪ରେ ୟୁକ୍ରେନ୍ ଉପରେ ରୁଷିଆ ଆକ୍ରମଣ କରିବା ପରଠାରୁ ପୁଟିନ୍ଙ୍କ ସହ ବାଇଡେନ୍ ପ୍ରତ୍ୟକ୍ଷ ଭାବେ କଥା ହୋଇନାହାନ୍ତି। ମାର୍ଚ୍ଚରେ ବାଇଡେନ୍ ପୁଟିନ୍ଙ୍କୁ ଜଣେ କଂସେଇ ଭାବେ ଅଭିହିତ କରି ସେ କ୍ଷମତାରେ ରହିପାରିବେ ନାହିଁ ବୋଲି କହିଥିଲେ। ଯୁଦ୍ଧକୁ ୯ ମାସ ବିତିବା ପରେ ବି ରୁଷିଆ ଘନଘନ ରକେଟ ଓ ମିଶାଇଲ୍ ମାଡ଼ କରି ବହୁ ଧନଜୀବନ ନଷ୍ଟ କରିବାରେ ଲାଗିଛି। ରୁଷୀୟ ସୈନ୍ୟଙ୍କ ଆକ୍ରମଣରେ ବହୁ ୟୁକ୍ରେନୀୟ ସହରର ବିଦ୍ୟୁତ୍ ଓ ପାନୀୟ ଜଳ ଭିତ୍ତିଭୂମି ନଷ୍ଟ ହୋଇଯାଇଛି। ଇତିମଧ୍ୟରେ ଶୀତଋତୁର ଆଗମନ ଫଳରେ ୟୁକ୍ରେନ୍ବାସୀ ହାଡ଼ଭଙ୍ଗା ଶୀତରେ ଥରୁଛନ୍ତି। ପାଶ୍ଚାତ୍ୟ ଦେଶଗୁଡ଼ିକ ୟୁକ୍ରେନ୍କୁ ସାମରିକ ସହାୟତା ବୃଦ୍ଧି ପାଇଁ ଉଦ୍ୟମ ଜାରି ରଖିଛନ୍ତି। ଏପରି ସମୟରେ ମସ୍କୋର ଯୁଦ୍ଧ ପ୍ରୟାସ ପାଇଁ ଉପଲବ୍ଧ ଅର୍ଥ ହ୍ରାସ ସକାଶେ ୟୁରୋପୀୟ ସଂଘ (ଇୟୁ) ରୁଷୀୟ ସମୁଦ୍ରବାହୀ ତୈଳକୁ ବ୍ୟାରେଲ ପିଛା ୬୦ ଡଲାରରେ ସୀମିତ ରଖିବାକୁ ନିଷ୍ପତ୍ତି ନେଇଛି। ତେବେ ଏହି ପଦକ୍ଷେପକୁ ଇୟୁ ସରକାରମାନେ ଏକ ଲିଖିତ ପ୍ରକ୍ରିୟାରେ ଅନୁମୋଦନ କରିବା ବାକି ଅଛି।