ନୂଆଦିଲ୍ଲୀ, ୪।୫ : ଭାରତୀୟ ରିଜର୍ଭ ବ୍ୟାଙ୍କ (ଆର୍ବିଆଇ) ପକ୍ଷରୁ ବଡ଼ ଝଟ୍କା ପ୍ରଦାନ କରାଯାଇଛି। ରେପୋ ରେଟ୍ରେ ୦.୪୦ ପ୍ରତିଶତ ବୃଦ୍ଧି ହୋଇ ୪.୪୦ ପ୍ରତିଶତ କରାଯାଇଛି। ଗଭର୍ନର ଶକ୍ତିକାନ୍ତ ଦାସ ବୁଧବାର ଏହା ଘୋଷଣା କରିଛନ୍ତି।
ଏହା ସହିତ ଆରବିଆଇ କ୍ୟାସ ରିଜର୍ଭ ରେସିଓ (ସିଆର୍ଆର୍)କୁ ୦.୫୦ ପ୍ରତିଶତ ବୃଦ୍ଧି କରାଯାଇଛି। ଫଳରେ ଏବେ ସିଆର୍ଆର୍ ୪.୫୦ ପ୍ରତିଶତକୁ ବୃଦ୍ଧି ପାଇଛି। ଫଳରେ ବ୍ୟାଙ୍କ ସମେତ ସାଧାରଣ ଲୋକଙ୍କ ପାଇଁ ଋଣ ନେବା ମହଙ୍ଗା ହେବ।
ସେ କହିଛନ୍ତି ଯେ ବିଶ୍ୱ ଅର୍ଥନୈତିକ କାର୍ଯ୍ୟକଳାପ ଏବଂ ଗତି ମନ୍ଥର ହେବାରେ ଲାଗିଛି। ଏହାର ପ୍ରଭାବ ଭାରତୀୟ ବଜାରରେ ମଧ୍ୟ ଦେଖାଯାଉଛି। ଦେଶରେ ଦରଦାମ୍ ବୃଦ୍ଧି ପାଉଛି। ଦ୍ରବ୍ୟ ବଜାରରେ ମଧ୍ୟ ହ୍ରାସ ଘଟିଛି। ମୁଦ୍ରା ନୀତି ଉପରେ ନିୟମ ପୁସ୍ତକ ଅନୁଯାୟୀ, କାର୍ଯ୍ୟ କରାଯାଏ ନାହିଁ । ଏହା ସବୁବେଳେ ବଜାର ସ୍ଥିତି ଆଧାରରେ ସମ୍ପନ୍ନ ହୋଇଥାଏ।
ଆରବିଆଇର ମୁଦ୍ରା ନୀତି ସମୀକ୍ଷା ବୈଠକ ଜୁନ ୬ରୁ ୮ ମଧ୍ୟରେ ରେ ଅନୁଷ୍ଠିତ ହେବ। କିନ୍ତୁ ଏହାପୂର୍ବରୁ ବିଶ୍ୱର ଅର୍ଥନୈତିକ ଅବସ୍ଥାକୁ ଦୃଷ୍ଟିରେ ରଖି ଆରବିଆଇ ରେପୋ ରେଟ୍କୁ ବୃଦ୍ଧି କରିଛି। ଏହାପୂର୍ବରୁ, ୬ରୁ ୮ ଏପ୍ରିଲରେ ହୋଇଥିବା ବୈଠକରେ ସୁଧ ହାରରେ କୌଣସି ବୃଦ୍ଧି କରାଯାଇ ନଥିଲା। ଦେଶରେ ମୁଦ୍ରାସ୍ଫୀତିର ଚାପକୁ ଦୃଷ୍ଟିରେ ରଖି ଆରବିଆଇ ଗଭର୍ନର କହିଛନ୍ତି ଯେ ଏହା କରିବା ଜରୁରୀ ହୋଇପଡିଛି ତେଣୁ ଏହି ନିଷ୍ପତ୍ତି ନିଆଯାଉଛି। ଏହା ବ୍ୟତୀତ ବିଶ୍ୱର ରାଜନୈତିକ ଅବସ୍ଥା ଅନୁଯାୟୀ ଦେଶରେ ନୀତିଗତ ହାରରେ ପରିବର୍ତ୍ତନ କରିବା ଆବଶ୍ୟକ ହୋଇପଡ଼ିଥିବା ସେ କହିଛନ୍ତି।