ମେଲବର୍ନ,୨।୯: ଚଳିତ ବର୍ଷ ହେବାକୁ ଥିବା ଟି୨୦ ବିଶ୍ୱକପ୍ ପାଇଁ ପ୍ରଶଂସକଙ୍କ କ୍ରେଜ୍ କାହିଁରେ କେତେ। ଅଷ୍ଟ୍ରେଲିଆରେ ହେବାକୁ ଥିବା ଏହି ଟୁର୍ନାମେଣ୍ଟରେ ଭାଗ ନେବାକୁ ଥିବା ଦଳଗୁଡ଼ିକ ପକ୍ଷରୁ ପ୍ରସ୍ତୁତି ପ୍ରାୟ ଶେଷ ହୋଇଛି। ଅକ୍ଟୋବର ୧୯ରୁ ଏହା ଆରମ୍ଭ ହୋଇ ନଭେମ୍ବର ୧୩ ଯାଏ ଚାଲିବ। ବିଶେଷକରି ଫାଇନାଲ ମୁକାବିଲା କାହା କାହା ମଧ୍ୟରେ ଖେଳାଯିବ ଏବଂ କିଭଳି ଦେଖାଯାଇପାରିବ ତାକୁ ନେଇ ପ୍ରଶଂସକ ଏବେଠାରୁ ବ୍ୟସ୍ତ ହୋଇପଡ଼ିଲେଣି। ଟୁର୍ନାମେଣ୍ଟ ଫାଇନାଲ ସମେତ ବାକି ମୁକାବିଲା ଲାଗି ଟିକେଟ୍ ପାଇବା ଲାଗି ସମସ୍ତେ ଚାହିଁ ରହିଛନ୍ତି। ଏଭଳି ସମୟେରେ ପ୍ରଶଂସକଙ୍କ ଲାଗି ଏକ ଖୁସିଖବର ଆସିଛି।
ମେଲବର୍ନ କ୍ରିକେଟ ମାନେଜମେଣ୍ଟ ପକ୍ଷରୁ ପ୍ରଶଂସକଙ୍କୁ ମାଗଣାରେ ବିଶ୍ୱକପ୍ ଫାଇନାଲ ମ୍ୟାଚ୍ ଲାଗି ଟିକେଟ ଜିତିବାକୁ ସୁଯୋଗ ଦେଇଛି। ଏହାର ଏକ ଭିଡିଓ ବାର୍ତ୍ତା ଭାରତର ଷ୍ଟାର ଉଇକେଟକିପର ଋଷଭ ପନ୍ତ ଶେୟାର କରିଛନ୍ତି। ନିଜର ଇନଷ୍ଟାଗ୍ରାମରେ ପନ୍ତ ଭିଡିଓ ଶେୟାର କରି ମାଗଣା ଟିକେଟ ଜିତିବାର ସୁଯୋଗ ବିଷୟରେ କହିଛନ୍ତି।
ମେଲବର୍ନ କ୍ରିକେଟ ମାନେଜମେଣ୍ଟ ମାଗଣା ଟିକେଟ ପାଇଁ ନିଜର ଓ୍ବେବସାଇଟ୍ରେ ଏକ ଫର୍ମ ଜାରି କରିଛି। ଏଥିରେ ଦିଆଯାଇଥିବା କିଛି ପ୍ରଶ୍ନର ଉତ୍ତର ଦେବାକୁ ହେବ। ଏଥିସହ ନିଜର ନାମ, ମୋବାଇଲ ଏବଂ ରହୁଥିବା ଠିକଣା ଦେବାକୁ ହେବ। ଫର୍ମ ଦାଖଲ କରିବା ପରେ ଯେକେହି ମାଗଣା ଟିକେଟ ଜିତିପାରନ୍ତି। ଏହା ଚୟନ ପ୍ରକ୍ରିୟା ଉପରେ ଆଧାରିତ ହେବ। କେବଳ ଏତିକି ନୁହେଁ ମ୍ୟାନେଜମେଣ୍ଟ ପକ୍ଷରୁ ପ୍ରଶଂସକଙ୍କ ଲାଗି ଫାଇନାଲ ମ୍ୟାଚ୍ ଟିକେଟ ସହ ଏକ ଫ୍ଲାଇଟ୍ ଟିକେଟର ବ୍ୟବସ୍ଥା କରାଯାଇଛି। ଅର୍ଥାତ ପ୍ରଶଂସକଙ୍କୁ ବିମାନ ଟିକେଟ ବିଷୟରେ ଚିନ୍ତା କରିବାକୁ ପଡ଼ିବ ନାହିଁ। ଅଧିକ ସୂଚନା ଏବଂ ଟିକେଟ ଲାଗି visitmelbourne.com ଓ୍ବେବ୍ସାଇଟ୍କୁ ଯିବାକୁ ହେବ।