ମୁମ୍ବାଇ,୮।୬: ଏନସିବି ମୁମ୍ବାଇର ପୂର୍ବତନ ଜୋନାଲ ନିର୍ଦ୍ଦେଶକ ସମୀର ୱାଖେଡେଙ୍କୁ ବମ୍ବେ ହାଇକୋର୍ଟରୁ ବଡ଼ ଆଶ୍ୱସ୍ତି ମିଳିଛି। ସିବିଆଇ ଦ୍ୱାରା ପଞ୍ଜୀକୃତ ହୋଇଥିବା ଚୋରା ଚାଲାଣ ଏବଂ ଲାଞ୍ଚ ମାମଲାରେ କୋର୍ଟ ବର୍ତ୍ତମାନ ତାଙ୍କର ଗିରଫଦାରୀରୁ ମଧ୍ୟବର୍ତ୍ତୀକାଳୀନ ସୁରକ୍ଷାକୁ ଜୁନ ୨୩ ପର୍ଯ୍ୟନ୍ତ ବୃଦ୍ଧି କରିଛନ୍ତି। ଅଭିଯୋଗ ଅନୁଯାୟୀ, ଅକ୍ଟୋବର ୨୦୨୧ ରେ ଏକ କ୍ରୁଜ ଜାହାଜରୁ ଡ୍ରଗ୍ସ ଜବତ ମାମଲାରେ ଅଭିନେତା ଶାହରୁଖ ଖାନଙ୍କ ପୁଅ ଆର୍ୟନ ଖାନଙ୍କୁ ଗିରଫ କରାଯାଇଥିଲା। ମାମଲାର ରଫାଦଫା ନେଇ ୱାଖେଡେ ଶାହାରଖଙ୍କଠାରୁ ୨୫ କୋଟି ଟଙ୍କା ଲାଞ୍ଚ ମାଗିଥିବା ଅଭିଯୋଗ ହୋଇଥିଲା।
ଏହି ମାମଲାର ଶୁଣାଣି କରି ଜଷ୍ଟିସ ଏସ ଗଡକରୀ ଏବଂ ଜଷ୍ଟିସ ଏସ.ଜି ଦିଗେଙ୍କ ଏକ ବେଞ୍ଚ କହିଛନ୍ତି ଯେ, ଏହି ଘଟଣାରେ କେନ୍ଦ୍ରୀୟ ତଦନ୍ତ ବ୍ୟୁରୋ (ସିବିଆଇ) ଏଫଆଇଆର୍ ରଦ୍ଦ କରିବାକୁ ଜୁନ ୨୩ ୱାଖେଡେଙ୍କ ଆବେଦନ ଶୁଣାଣି ହେବ। ୱାଖେଡେଙ୍କ ପରାମର୍ଶଦାତା ଆବାଦ ପାଣ୍ଡେ ହାଇକୋର୍ଟଙ୍କୁ କହିଛନ୍ତି ଯେ କୋର୍ଟଙ୍କ ପୂର୍ବ ନିର୍ଦ୍ଦେଶ ଅନୁଯାୟୀ ଭାରତୀୟ ରାଜସ୍ବ ସେବା (ଆଇଆରଏସ) ଅଧିକାରୀ ୭ ଥର ପଚରାଉଚରା ପାଇଁ ସିବିଆଇରେ ହାଜର ହୋଇଛନ୍ତି ଏବଂ ଏହି ଘଟଣାରେ ମଧ୍ୟ ସହଯୋଗ କରୁଛନ୍ତି।
