ନୂଆଦିଲ୍ଲୀ, ୩୦।୮ : ଦିଲ୍ଲୀ ଦଙ୍ଗା ସମୟରେ ଉତ୍ତେଜନା ସୃଷ୍ଟିକାରୀ ବିବୃତ୍ତି ସମ୍ପର୍କରେ ସୋନିଆ ଗାନ୍ଧୀ ଏବଂ ରାହୁଲ ଗାନ୍ଧୀ ଦିଲ୍ଲୀ ହାଇକୋର୍ଟରେ ଏକ ସତ୍ୟପାଠ ଦାଖଲ କରିଛନ୍ତି। ଦିଲ୍ଲୀ ହାଇକୋର୍ଟରେ ଦାଖଲ ହୋଇଥିବା ସତ୍ୟପାଠରେ ସୋନିଆ ଗାନ୍ଧୀ ଏବଂ ରାହୁଲ ଗାନ୍ଧୀ କହିଛନ୍ତି ଯେ ସେମାନଙ୍କୁ ଜାଣିଶୁଣି ଟାର୍ଗେଟ କରାଯାଉଛି।
ଏହା ଜନସ୍ବାର୍ଥ ମାମଲା ନୁହେଁ ଏହା ପବ୍ଲିସିଟି ଇଣ୍ଟ୍ରେଷ୍ଟ ଲିଟିଗେଶନ । ଆବେଦନକୁ ବିରୋଧ କରି ସେମାନେ କୌଣସି ଉତ୍ତେଜନା ସୃଷ୍ଟିକାରୀ ବିବୃତ୍ତି ଦେଇନାହାନ୍ତି ବୋଲି ଏଥିରେ ଦର୍ଶାଇଛନ୍ତି। ସେମାନଙ୍କ ବିରୋଧରେ ମାମଲା ରୁଜୁ ଏଫଆଇଆରକୁ ପ୍ରତ୍ୟାଖ୍ୟାନ କରାଯିବା ଉଚିତ ବୋଲି ସତ୍ୟପାଠରେ ଉଲ୍ଲେଖ କରାଯାଇଛି॥
ବାସ୍ତବରେ, ଫେବୃଆରୀ ୨୦୨୦ ରେ ଉତ୍ତର-ପୂର୍ବ ଦିଲ୍ଲୀରେ ହୋଇଥିବା ଦଙ୍ଗା ସହ ଜଡିତ ବିଭିନ୍ନ ଆବେଦନ ଉପରେ ହାଇକୋର୍ଟ ଶୁଣାଣି କରୁଛନ୍ତି। ଏହି ମାମଲାରେ ଦୁଇଟି ଆବେଦନ କରାଯାଇଛି ଯେଉଁଥିରେ ଉତ୍ତେଜନା ସୃଷ୍ଟିକାରୀ ଭାଷଣ ଦେଇଥିବା ରାଜନେତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବକୁ କୁହାଯାଇଛି।
ଶେଖ ମୁଜତାବା ଫାରୁକଙ୍କ ଦ୍ୱାରା ଦାଖଲ ହୋଇଥିବା ଏହି ପିଟିଶନରେ ଘୃଣ୍ୟ ଭାଷଣ ଅଭିଯୋଗରେ ଭାଜପା ନେତା ଅନୁରାଗ ଠାକୁର, କପିଲ ମିଶ୍ର, ପରଭେଶ ବର୍ମା ଏବଂ ଅଭୟ ବର୍ମାଙ୍କ ବିରୋଧରେ ଏଫଆଇଆର ପଞ୍ଜିକରଣ କରିବାକୁ କୁହାଯାଇଛି। କଂଗ୍ରେସ ନେତା ସୋନିଆ ଗାନ୍ଧୀ, ରାହୁଲ ଗାନ୍ଧୀ ଏବଂ ପ୍ରିୟଙ୍କା ଗାନ୍ଧୀ ତଥା ଦିଲ୍ଲୀ ଉପମୁଖ୍ୟମନ୍ତ୍ରୀ ମନୀଷ ସିସୋଡିଆ, ଆମ ଆଦମୀ ପାର୍ଟି ବିଧାୟକ ଅମାନତୁଲ୍ଲା ଖାନ, ଏଆଇଏମଆଇଏମ ନେତା ଅସଦ୍ଦିଦିନ ଓୱାଇସିଙ୍କ ଦ୍ୱାରା ଘୃଣ୍ୟ ଭାଷଣ ଦିଆଯାଇଥିବା ଅଭିଯୋଗରେ ଦ୍ୱିତୀୟ ଆବେଦନ କରାଯାଇଥିଲା। ପୂର୍ବତନ ବିଧାୟକ ୱାରିସ ପଠାନ, ମେହମୁଦ ପ୍ରାଚା, ହର୍ଷ ମନ୍ଦର, ମୁଫତି ମହମ୍ମଦ ଇସମାଇଲ, ଅଭିନେତ୍ରୀ ସ୍ବରା ଭାସ୍କର, ଉମର ଖାଲିଦଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ ଲାଗି ଦାବି କରାଯାଇଥିଲା।