ସେଞ୍ଚୁରିଆନ,୨୫।୩: ନିକଟରେ ବାଂଲାଦେଶଠାରୁ ୨-୧ରେ ଦିନିକିଆ ସିରିଜ୍ ପରାସ୍ତ ହୋଇଛି ଦକ୍ଷିଣ ଆଫ୍ରିକା। ତେବେ ଏହି ସିରିଜ୍ ପରାଜୟ ଯୋଗୁ ଆଗାମୀ ବିଶ୍ୱକପ୍ ଲାଗି ଯୋଗ୍ୟତା ହାସଲ କରିବା ପାଇଁ ଦକ୍ଷିଣ ଆଫ୍ରିକା ସଂଘର୍ଷ କରିବାକୁ ପଡ଼ିବ। ୨୦୨୩ ଅକ୍ଟୋବର ଏବଂ ନଭେମ୍ବରରେ ଭାରତରେ ହେବାକୁ ଅଛି ଦିନିକିଆ ବିଶ୍ୱକପ୍। ଏହି ଇଭେଣ୍ଟରେ ଅଂଶଗ୍ରହଣ କରିବା ପାଇଁ ଦକ୍ଷିଣ ଆଫ୍ରିକାକୁ ତା’ର ବଳକା ସିରିଜ୍ରେ ଭଲ ପ୍ରଦର୍ଶନ କରିବାକୁ ପଡ଼ିବ।
ବାଂଲାଦେଶଠାରୁ ସିରିଜ୍ ହାରିବା ପରେ ଦକ୍ଷିଣ ଆଫ୍ରିକା ବିଶ୍ୱକପ୍ ସୁପର ଲିଗ୍ରେ ୯ମ ସ୍ଥାନକୁ ଖସି ଆସିଛି। ୨୦୨୩ ବିଶ୍ୱକପ୍ରେ ଆୟୋଜକ ଭାରତ ସମେତ କେବଳ ୮ ଦଳ ସିଧାସଳଖ ଯୋଗ୍ୟତା ଅର୍ଜନ କରିବେ। ବିଶ୍ୱକପ୍ ପୂର୍ବରୁ ହେବାକୁ ଥିବା ଯୋଗ୍ୟତା ପର୍ଯ୍ୟାୟରୁ କେବଳ ୨ ଦଳ ମୁଖ୍ୟ ପର୍ଯ୍ୟାୟକୁ ଉନ୍ନୀତ ହେବେ।
“ବିପଦ ଘଣ୍ଟି ବାଜି ସାରିଛି। ଆମେ ନିଜକୁ ଚାପରେ ପକାଇଛୁ। ବାଂଲାଦେଶ ବିପକ୍ଷରେ ଆମ ଦଳ ପୂରା ଶୋଇ ପଡ଼ିଥିଲା। ଆମକୁ ଉନ୍ନତ ପ୍ରଦର୍ଶନ କରିବାକୁ ପଡ଼ିବ। କିନ୍ତୁ ସିଧାସଳଖ ଯୋଗ୍ୟତା ଏବେ ବି ସମ୍ଭବ” ବୋଲି କହିଛନ୍ତି ଦକ୍ଷିଣ ଆଫ୍ରିକାର ମୁଖ୍ୟ କୋଚ୍ ମାର୍କ ବାଉଚର। ତେବେ ପ୍ରୋଟିଜ ଦଳ ସେମାନଙ୍କ ୧୩ ସୁପର ଲିଗ୍ ସିରିଜ୍ ମଧ୍ୟରୁ ମାତ୍ର ୪ଟି ଜିତିଛି। ଏଭଳି ପରିସ୍ଥିତିରେ ବିଶ୍ୱକପ୍ ଯୋଗ୍ୟତା ହାସଲ କରିବା ପାଇଁ ଦକ୍ଷିଣ ଆଫ୍ରିକାକୁ ବଳକା ୩ ସିରିଜ୍ରେ ଭଲ ପ୍ରଦର୍ଶନ କରିବାକୁ ପଡ଼ିବ। କିନ୍ତୁ ଏହି ୩ ସିରିଜ୍ରେ ଦଳକୁ ଇଂଲଣ୍ଡ, ଭାରତ ଏବଂ ଅଷ୍ଟ୍ରେଲିଆ ଭଳି ଶକ୍ତିଶାଳୀ ଦଳକୁ ଭେଟିବାର ଅଛି।