ମୁଜାଫରପୁର,୨୬।୧୧: ଗତ ଏପ୍ରିଲ-ମେ’ ମାସରେ ବିହାରର ରୋହତାସ, ଜାହାନାବାଦ ଏବଂ ବାଙ୍କା ଜିଲାରୁ ୩ଟି ଲୁହା ବ୍ରିଜ୍କୁ ଚୋରମାନେ ଗ୍ୟାସ୍ କଟରରେ କାଟି ଚୋରି କରି ନେଇଥିଲେ। ଏବେ ବିହାର ବେଗୁସରାଇ ଜିଲାରେ ଚୋରମାନେ ସୁଡ଼ଙ୍ଗ ଖୋଳି ସମ୍ପୂର୍ଣ୍ଣ ଡିଜେଲ୍ ଟ୍ରେନ୍ ଇଞ୍ଜିନ୍ ଚୋରିକରି ନେଇଯାଇଛନ୍ତି। ମରାମତି ପାଇଁ ଆସିଥିବା ଇଞ୍ଜିନ୍ଟି ବହୁଦିନ ହେଲା ବେଗୁସରାଇ ରେଲଓ୍ବେ ୟାର୍ଡରେ ଛିଡ଼ାହୋଇଥିଲା। ଚୋରମାନେ ସୁଡ଼ଙ୍ଗ ଖୋଳି ଇଞ୍ଜିନ୍ର ଗୋଟିଏ ପରେ ଗୋଟିଏ ପାର୍ଟସ ଖୋଲି ନେଇଯାଇଥିବା ପୋଲିସ କହିଛି। ଏ ନେଇ ଗତ ସପ୍ତାହରେ ପରାଉଣି ଥାନାରେ ମାମଲା ରୁଜୁ ହୋଇଛି। ଇଞ୍ଜିନ୍ ଚୋରିରେ ସମ୍ପୃକ୍ତ ୩ ଜଣଙ୍କୁ ଗିରଫ କରାଯାଇଥିବା ମୁଜାଫରପୁର ରେଳ ସୁରକ୍ଷା ବଳ(ଆର୍ପିଏଫ୍)ର ଇନ୍ସପେକ୍ଟର ପି.ଏସ୍. ଦୁବେ କହିଛନ୍ତି। ଜେରା ବେଳେ ସେମାନଙ୍କଠାରୁ ମିଳିଥିବା ସୂଚନା ଆଧାରରେ ମୁଜାଫରପୁର ଜିଲା ପ୍ରଭାତ ନଗର ଅଞ୍ଚଳରେ ଥିବା ଏକ ସ୍କ୍ରାପ୍ ଗୋଦାମରେ ଚଢ଼ାଉ କରାଯାଇଥିଲା। ସେଠାରୁ ୧୩ଟି ଅଖାରେ ଥିବା ଟ୍ରେନ୍ ପାର୍ଟସ ମିଳିଛି। ସ୍କ୍ରାପ୍ ଗୋଦାମ ମାଲିକଙ୍କୁ ପୋଲିସ ଖୋଜୁଛି। ଜବତ ସାମଗ୍ରୀ ମଧ୍ୟରେ ଇଞ୍ଜିନ୍ ପାର୍ଟସ, ଭିଣ୍ଟେଜ୍ ଟ୍ରେନ୍ ଇଞ୍ଜିନ୍ର ଚକ ଓ ଅନ୍ୟାନ୍ୟ ପାଟର୍ସ ରହିଛି। ଲୁହା ବ୍ରିଜ୍ ଚୋରି ଘଟଣାରେ ମଧ୍ୟ ଉକ୍ତ ଚୋର ସମ୍ପୃକ୍ତ ବୋଲି ଦୁବେ କହିଛନ୍ତି।