ମୁମ୍ବାଇ,୩୧।୫: ରିଲାଏନ୍ସ ଫାଉଣ୍ଡେଶନ ପକ୍ଷରୁ ନିକଟରେ ଏକ ୩ ଦିନିଆ ପାରମ୍ପରିକ କଳା ଓ ହସ୍ତକଳା ପ୍ରଦର୍ଶନୀ ‘ସ୍ବଦେଶ’ର ଆୟୋଜନ ମୁମ୍ବାଇର ନୀତା ମୁକେଶ ଅମ୍ବାନୀ କଲ୍ଚରାଲ୍ ସେଣ୍ଟର (ଏନ୍ଏମ୍ଏସିସି) ଠାରେ କରାଯାଇଥିଲା। ବିଶେଷକରି ଦେଶର କୋଣ ଅନୁକୋଣର ପାରମ୍ପରିକ କାରିଗରମାନଙ୍କ ଦ୍ୱାରା ପ୍ରସ୍ତୁତ କରାଯାଇଥିବା ବିଭିନ୍ନ ସାମଗ୍ରୀ ପ୍ରଦର୍ଶନୀରେ ପ୍ରଦର୍ଶିତ ହୋଇଥିଲା। ସେହିଭଳି ପାରମ୍ପରିକ କାରିଗରମାନଙ୍କ କାରୁକାର୍ଯ୍ୟକୁ ଦେଖିବା ପାଇଁ ଏନ୍ଏମ୍ଏସିସି ପରିସରରେ ବିପୁଳ ଜନ ସମାଗମ ହୋଇଥିଲା। ଏପରିକି ବିଭିନ୍ନ ବିଷୟ ଓ ସବୁ ବର୍ଗଙ୍କ ଆଗ୍ରହଙ୍କ ନଜରରେ ରଖି ଫାଉଣ୍ଡେଶନ ପକ୍ଷରୁ ଉକ୍ତ ପ୍ରଦର୍ଶନୀର ଅବଧିକୁ ବଢାଇ ଦିଆଯାଇଛି।
ଏ ସମ୍ପର୍କରେ ରିଲାଏନ୍ସ ଫାଉଣ୍ଡେଶନର ଅଧ୍ୟକ୍ଷା ନୀତା ଅମ୍ବାନୀ କହିଛନ୍ତି, ଭାରତୀୟ ଓ ଆନ୍ତର୍ଜାତିକ ଅତିଥିମାନଙ୍କଠାରୁ କାରିଗରମାନେ ଯେଉଁଭଳି ବିପୁଳ ପ୍ରଶଂସା ପାଉଛନ୍ତି ଓ ଧ୍ୟାନ ଆକର୍ଷଣ କରିଛନ୍ତି, ତାହା ଦେଖି ମୋତେ ବହୁତ ଆନନ୍ଦ ଲାଗୁଛି। ଏପରିକି ସେମାନଙ୍କ ସହିତ ଭାବ ବିନିମୟକୁ ମୁଁ ସ୍ମରଣ କରୁଛି ଏବଂ ସେମାନଙ୍କ କାହାଣୀ ଶୁଣିବା ତଥା ନିଜ କଳା ପ୍ରତି ସେମାନଙ୍କ ଅସାଧାରଣ ଆବେଗ ଦେଖିବା ବେଶ୍ ଉଲ୍ଲେଖନୀୟ ବୋଲି ନୀତା ମତବ୍ୟକ୍ତ କରିଛନ୍ତି। ସେହିଭଳି ସ୍ବଦେଶ ହେଉଛି ଆମ ଐତିହ୍ୟର ଏକ ଉତ୍ସବ ଏବଂ ମୁଁ ଆଶା କରୁଛି ଯେ ଏହା ଆମ କାରିଗରମାନଙ୍କ ପାଇଁ ସମ୍ମାନ,ସ୍ବୀକୃତି ଓ ରୋଜଗାରର ଏକ ନୂଆ ଶୁଭାରମ୍ଭ। ବିଶେଷକରି ଭାରତୀୟ କାରିଗରମାନେ ହେଉଛନ୍ତି ଦେଶର ଗର୍ବ। ସେମାନଙ୍କ କଳା ଓ ହସ୍ତକଳା ହେଉଛି ଆମ ସଂସ୍କୃତିର ଅବିଚ୍ଛେଦ୍ୟ ଅଙ୍ଗ। ସେମାନଙ୍କ ଦକ୍ଷତା ଓ ପ୍ରତିଭାକୁ ପ୍ରଦର୍ଶନ କରିବା ସହ ସେସବୁକୁ ଆହୁରି ଶାଣିତ କରିବା ସହିତ ଆଗାମୀ ପିଢ଼ିଙ୍କ ପାଖରେ ତାହା ପହଞ୍ଚାଇବା ଲାଗି ସେମାନଙ୍କୁ ଏକ ବିଶ୍ୱସ୍ତରୀୟ ମଞ୍ଚ ପ୍ରଦାନ କରିଥିବାରୁ ଆମେ ବେଶ୍ ଗର୍ବିତ ମନେକରୁଛୁ ବୋଲି ନୀତା ମତପ୍ରକାଶ କରିଛନ୍ତି।